ATOL sa pagsaulog sa ika 124 ka tuig nga Independence Day karong bag-o, giila ni Governor-elect Aris Aumentado ang mga tawo kaniadto kinsa nakigbisog aron makab-ot ang kagawasan sa nasud nga Pilipinhon.
Matud ni Aumentado nga special karong tuiga ang Independence Day tungod kay hapit na usab kita makalingkawas sa pakigbatok sa COVID-19 diin ubos sa duha ka tuig nga pakigbatok sa virus diha nakita ang sakripisyo sa bag-ong bayani nga mao ang frontliners.
“We owe our lives to our frontliners. If not for them, we will not be here”, matud ni Aumentado.
Sigon ni Aumentado nga sa maong adlaw giselebrar ang buhat sa tanang bayani ilabi na sa ilang pagpakamatay alang sa kagawasan sa nasud kaniadto.
Apil usab sa gidayeg niini ang mga bayani karon nga nakigbisog aron mamahimo na kitang gawasnon gikan sa makamatay nga balatian.
Kinahanglan usab nga ipadayon ang panaghiusa nga nasugdan na sa milabay nga eleksyon aron mahimong gabay aron malampasan ang hagit nga gisagubang sa nasud, sigon niini.
Gipasabot sa bag-ong gobernador sa Bohol nga sulod sa dugay nga panahon nakat-unan na sa mga Pinoy nga makigbatuk sa pag-ila ug tinguha nga makabaton ug kaugalingnan ug determinasyon sa mahimong kapalaran sa nasud ug katawhan.
Dugang niini nga daghan kaayo tang hagit nga naagian ug pipila usab kita ka higayon nga gisuwayan sa panahon ug higayon nga dala sa hulga sa pagkawatak-watak pero nagpabilin ang paghigugma sa nasud.
Gibutyag ni Aumentado nga sa nakalabay nga duha ka tuig subli na usab kita nga gisuwayan sa pandemya diin lain-lain man ang atong gihimo na mga pamaagi pero usa lang gihapon ang direksyon, ang makabangon ang nasud ug makalingkawas sa mga pagsuway ug hagit dala sa pandemya. (RTB)
