- SOMA nagtuki sa sosyal nga serbisyo, agrikultura, negosyo, edukasyon, panglawas, imprastruktura ug maayong pagdumala
VALENCIA, Bohol — Gipresentar ni Mayor Dionisio Neil A. Balite ang mga nahimo sa iyang administrasyon ug ang sunod nga mga prayoridad sa Valencia sa sosyal nga serbisyo, agrikultura, panginabuhian, edukasyon, panglawas, imprastruktura, kaluwasan ug pagdumala atol sa iyang State of the Municipality Address (SOMA) niadtong Oktubre 27, 2026.
Gihatod ang SOMA atol sa Valencia Day ug ika-157 nga Founding Anniversary sa lungsod, diin gisusi ni Balite ang unang tibuok tuig sa iyang ikaduhang termino gikan Hulyo 1, 2025 hangtod Hunyo 30, 2026, uban sa mga update hangtod Oktubre 2026.
Nagpabilin nga giya sa administrasyon ang PEPSI COLA commitments sa panginabuhian, edukasyon, panglawas, sosyal nga serbisyo, imprastruktura, kooperatiba, oportunidad sa kabatan-onan, law and order ug agrikultura, samtang ang serbisyo giangkla sa BARUG — Better, Affectionate, Responsive, Unifying Governance.
Giorganisar ni Balite ang iyang report ubos sa pulong VALENCIA, nga naglangkob sa Valuing Every Valencianhon; Advancing Agriculture and Food Security; Livelihoods and Local Enterprise; Education and Youth Opportunities; Nurturing Health and Well-being; Culture, Heritage and Community Pride; Infrastructure, Safety and Resilience; ug Accountable and Innovative Governance.
773 KA PANIMALAY NABISITA
Ubos sa Valuing Every Valencianhon, gipasiugda ni Balite ang iyang personal nga outreach initiative nga Duaw-Pamahaw, nga gisugdan niadtong Agosto 1, 2024.
Hangtod Oktubre 24, 2026, nakompleto ang 22 ka hugna sa programa sa tanang 35 ka barangay, nga mikabat sa 773 ka household visits.
Gipasiugda usab sa mayor nga ang outreach dili lamang kutob sa pagbisita kondili sa pagtabang sa mga pamilya sa pag-access sa hustong serbisyo ug pag-follow up sa ilang panginahanglan.
Ang Assistance to Individuals in Crisis Situation (AICS) nakarekord usab og 1,739 beneficiary entries gikan 2022 hangtod Septiyembre 30, 2026, nga adunay gibana-banang ₱5.62 milyon nga obligated assistance.
Gipresentar usab ang BARUG Valencia CARENAV Ecosystem, nga gitumong sa pag-ila sa panginahanglan sa pamilya, paggiya kanila ngadto sa hustong serbisyo, ug pag-follow up sa referrals.
Nagtinguha ang LGU og ₱5 milyon nga suporta gikan sa Department of Science and Technology alang sa maong proposal.
FOOD SECURITY, AGRIKULTURA
Sa agrikultura, gipasiugda ni Balite nga sulod sa lima ka sunod-sunod nga tuig, gikan 2022 hangtod 2026, nakadaog ang Valencia og Best Booth and Product Display sa Sandugo Agri Fair ug Ubi Festival.
Sukad 2024, giila usab ang Valencia isip usa sa vegetable corridors sa Bohol.
Gipalambo usab ang Valencia Food Security and Price Stabilization Master Plan nga adunay planning horizon hangtod Hunyo 2031, uban sa pagtagad sa produksyon, irigasyon, farm access, merkado ug suporta sa mga mangingisda.
Gipahibalo usab sa mayor ang pag-andam sa Executive Order alang sa Backyard Gardening sa tanang panimalay, nga sugdan sa mga empleyado sa LGU sa Disyembre 2026.
Alang sa mga panimalay nga gamay ang luna, gidasig ang vertical ug container gardening.
BUSINESS CENTER NAKAPASULOD OG ₱22M
Sa panginabuhian ug local enterprise, gipasiugda ang pagbukas sa Valencia Business Center niadtong Enero 2026.
Ang bidding sa stalls ug units niini nakagenerate og kapin sa ₱22 milyon nga revenue.
Sa 2025, ang Badiang Spring Resort and Hotel, Waterworks ug Market nakagenerate og hiniusang ₱22.61 milyon.
Apan hangtod Septiyembre 30, 2026, ang tulo ka enterprises nakagenerate na og ₱36.84 milyon, bisan wala pa mahuman ang tuig.
Niadtong Agosto 15, 2026, giablihan usab ang Infinity Pool ug Kiddie Pool with Slide sa Badiang Spring Resort and Hotel isip kabahin sa padayong pagpalambo sa municipal enterprise.
LIBRENG TRANSPORTASYON SA ESTUDYANTE
Sa edukasyon, gipahibalo sa mayor nga nagpanghatag ang LGU og libreng school supplies ngadto sa public Day Care Centers ug elementary schools, samtang giandam ang bidding alang sa PE T-shirts sa tanang public elementary pupils.
Alang sa public high school students, giandam ang libreng transportasyon, uban sa plano nga i-bid ang duha ka sakyanan sa Nobyembre 2026 ug dugangan pa og duha sa 2027.
Plano usab sa 2027 ang pagtukod sa Mayor Maria Cajilog Memorial Elementary School sa Sitio Cabiringgil, Barangay Canmanico, subject sa mga kinahanglanong approval ug coordination sa DepEd.
Alang sa youth sector, gisumite sa SK Federation ang ₱2.065-milyon nga Programs, Projects and Activities package alang sa 2027, nga naglangkob sa edukasyon, health and mental wellness, sports, entrepreneurship, peace and security, leadership, environment ug agriculture.
SERBISYO SA PANGLAWAS GIPALAPAD
Sa panglawas, gipasiugda ni Balite ang annual Free Tuli, laboratory services sa Municipal Health Office, ug ang pagbukas sa Animal Bite Treatment Center niadtong Marso 2, 2026.
Sa 2027, gilauman ang pag-abli sa Community Rehabilitation Clinic alang sa mga stroke patients.
Gipahibalo usab ang umaabot nga partnership sa Governor Celestino Gallares Multi-Specialty Medical Center aron ang qualified Valencianhons mahimong mas organisado ang referral ngadto sa specialized diagnostic procedures nga wala makuha lokal.
Hangtod Agosto 24, 2026, adunay 4,126 ka senior citizens sa registry sa munisipyo, nga gigamit sa LGU isip basehan sa pagplano sa serbisyo ug assistance.
VALENCIA ASTRODOME
Sa kultura ug heritage, gipasiugda ang Sto. Niño Church, pottery traditions, Sang-at ug lokal nga mga artista isip kabahin sa identidad sa Valencia.
Usa sa mga highlight sa Valencia Week mao ang unveiling sa bag-ong signage sa Valencia Astrodome niadtong Oktubre 22.
Ang renaming gikan sa Mayor Pablo O. Lim Memorial Astrodome gisugdan pinaagi sa Association of Barangay Captains, giaprubahan sa Sangguniang Bayan ug walay objection gikan sa National Historical Commission of the Philippines.
Matud ni Balite, ang public facility iya sa tibuok katawhan ug ang ngalan nga Valencia Astrodome nagpakita sa sense of ownership ug belonging sa matag Valencianhon.
₱50.6M COMPLETED INFRA PROJECTS
Sa imprastruktura, mikabat sa gibana-banang ₱50.60 milyon ang completed works gikan Hulyo 2025 hangtod Oktubre 2026.
Lakip niini ang ₱14.10 milyon nga waterworks projects, improvement ug rehabilitation sa Badiang Spring Resort, solar streetlights, covered court/evacuation center, school ug public facility improvements, CCTV ug public-address systems, ug road, drainage, dike ug multi-purpose hall projects.
Aduna usab ₱40.50 milyon nga ongoing projects, lakip ang ₱15-milyon nga upgrading sa Municipal Waterworks System, ₱15-milyon nga Cultural Center improvement ug ₱10-milyon nga rehabilitation sa Municipal Building.
Laing ₱45 milyon nga water projects ang anaa sa documentary requirements stage, lakip ang ₱30-milyon nga Municipal Waterworks rehabilitation, ₱5-milyon nga reservoir sa Cansibao ug ₱10-milyon nga Maubo Cluster Bulk Water Project ubos sa PAMANA.
Ang Maubo project adunay ₱10 milyon nga funding assurance gikan sa OPAPRU, apan gipatin-aw sa mayor nga lahi ang funding assurance gikan sa actual implementation ug completion.
FIRETRUCK, PEACE AND ORDER
Gipunting usab sa mayor ang panginahanglan sa mas lig-on nga emergency response human mahimong unserviceable ang 4,000-liter Hyundai firetruck, samtang ang 2,000-liter Isuzu firetruck maoy nagpabiling serviceable.
Nagtinguha ang munisipyo og replacement firetruck aron mapalig-on ang response capability.
Sa peace and order, gipatuman niadtong Agosto 19, 2026 ang drug testing sa tanang municipal employees ug elected officials, lakip ang mayor.
Plano usab nga i-extend ang random ug unannounced drug testing ngadto sa tanang barangay officials.
Nag-andam usab ang LGU sa pagdonar og usa ka ektaryang lote sa Barangay Marawis ngadto sa national PNP alang sa Police Mobile Force Company facility.
ASSETS MISAKA SA ₱663.68M
Sa pinansyal nga kahimtang, mikabat sa ₱663.68 milyon ang total assets sa Valencia hangtod Septiyembre 30, 2026, gikan sa ₱600.23 milyon sa katapusan sa 2025.
Ang cash and cash equivalents mikabat sa ₱121.61 milyon, samtang ang Property, Plant and Equipment miabot sa ₱509.88 milyon.
Sa revenue, nakagenerate na ang Valencia og ₱193.60 milyon hangtod Septiyembre 30, o mga 95 porsyento sa total revenue sa tibuok 2025.
Ang Service and Business Income usab misaka gikan sa ₱28.37 milyon sa tibuok 2025 ngadto sa ₱41.99 milyon sa unang siyam ka bulan sa 2026.
Gipasiugda usab ni Balite ang plano sa pag-institutionalize sa Valencia Information and Communications Technology Unit (VICTU), uban sa permanent positions nga konsiderahon sa 2027 alang sa 2028 budget.
Gihisgutan usab niya ang iyang paghuman sa Course on Artificial Intelligence for LGUs sa Development Academy of the Philippines, diin gikumpirma sa DAP nga siya ang bugtong mayor tali sa participants sa unang tulo ka batches.
SERBISYO NGA MASUKOD
Sa pagtapos, gipasiugda ni Balite nga ang sunod nga tuig mag-focus sa follow-up alang sa vulnerable households, essential health support, food security ug livelihood activities, educational opportunities, water services, emergency readiness, heritage conservation ug mas maayong municipal transactions.
Matud niya, ang mga commitment sa administrasyon kinahanglan dili lamang “promises remembered,” kondili “work measured, delivered, and honestly accounted for.”
Gitawag usab niya ang matag Valencianhon sa pag-apil sa pag-ila sa unmet needs, pag-atiman sa public facilities, pagsuporta sa lokal nga panginabuhian ug pagmonitor sa commitments sa lokal nga kagamhanan.
