MAS dako ug mas daghang pasahero na ang masakop sa biyahe padung ug gikan sa Bohol human nagdugang og dagkong eroplano ang Philippine Airlines (PAL) ug Cebu Pacific. Tulo ka yunit sa Airbus A330 ug A330neo ang magbiyahe matag adlaw sa Bohol‑Panglao International Airport.
Gisugdan sa PAL dili palang dugay ang ilang unang biyahe gamit ang Airbus A330 gikan sa Manila padung sa Bohol. Pag-abot niini, hatagan kini og water cannon salute isip pagsaulog sa maong inagurahong paglupad.
Sa laing bahin, nagpaabot pa sa opisyal nga kumpirmasyon ang Cebu Pacific kon karong gabii ba magsugod na ang ilang operasyon gamit ang ikaduhang Airbus A330neo.
Base sa pahibalo nga gipadala kang Gobernador Aris Aumentado, ang Cebu Pacific adunay duha ka biyahe matag adlaw samtang usa ang sa PAL. Kini nagpasabot nga mas daghang tawo na ang makabiyahe ug makasulod sa probinsya.
Gipakita usab sa duha ka kompanya ang ilang pagsalig sa pagdako sa turismo ug ekonomiya sa Bohol. (RTB)
