SIYAM ka sentenaryong Bol-anon ang nakadawat og tag-₱100,000, o kinatibuk-ang ₱900,000, gikan sa Kagamhanang Probinsiyal sa Bohol (PGBh) isip pagpasidungog sa mga lungsoranon nga miabot sa edad nga 100 ka tuig.
Gitunol ang mga insentibo niadtong Oktubre 12 ug 13, uban sa plake sa pag-ila gikan sa gobernador ug sulat sa pagpahalipay gikan sa Sangguniang Panlalawigan.
Niadtong Oktubre 12, ang mga nakadawat mao sila Anselma Arseño sa Bolod, Panglao; Basilia Siez sa Concepcion, Loay; ug Esperanza Lloren sa Tubod Monte, Jagna.
Si Ian Bomediano sa Local Government Affairs Office maoy representante ni Gobernador Aris Aumentado, samtang personal nga mibisita sa mga sentenaryo si Carmelita Tecson, pangulo sa Office of the Provincial Social Welfare and Development (OPSWD), aron itunol ang ilang mga insentibo.
Pagka-Oktubre 13, nakadawat usab sila Anastasia Molina sa Tangnan, Loon; Norberta Caresosa ug Gerondia Podador, nga pulos taga-Cansuaguit, Loon; Anecita Magallon sa Potohan, Tubigon; Quirina Aplacador sa Cabulihan, Tubigon; ug Victoriana Mula sa Buacao, Clarin.
Miuban sa pagpanagtag sa ikaduhang adlaw si Board Member Lucille Lagunay sa Unang Distrito, nga maoy pangulo usab sa Committee on Social Services sa Sangguniang Panlalawigan.
Ang maong pag-ila naghatod og pagpahalipay sa ilang ika-100 nga adlawng natawhan ug pagpasidungog sa ilang natampo sa ilang mga pamilya, komunidad ug sa kalamboan sa Bohol.
Kabahin ang programa sa mas lapad nga pasalig sa PGBh sa pagdumalang naglakip sa tanang sektor ug sa pagkab-ot sa mga tumong sa Strategic Governance Roadmap sa Bohol ubos sa pagpangulo ni Gobernador Aumentado.
Pinaagi sa pag-ila sa kontribusyon sa mga Bol-anon sa nagkalainlaing henerasyon, padayon nga naningkamot ang PGBh sa pagpalambo sa mga komunidad nga lig-on ug makabarog sa kaugalingon sa tibuok Bohol Island UNESCO Global Geopark. (PIMO/MAPI)
