EPEKTIBO na kaniadtong Oktubre 14, 2026, ang bag-ong minimum wage sa mga trabahante sa pribadong sektor sa Bohol nga mosaka ngadto sa ₱542 kada adlaw, gikan sa kanhing ₱500.
Ang ₱42 nga dugang kabahin sa bag-ong sugo sa suhol alang sa tibuok Rehiyon VII, diin ang Bohol sakop sa mga dapit ubos sa Klasipikasyon B.
Sumala sa Department of Labor and Employment (DOLE), gibana-bana nga 337,476 ka trabahante sa pribadong sektor sa tibuok Central Visayas ang makabenepisyo niining pagtaas sa suhol.
Sa nagkalapad nga Metro Cebu o Klasipikasyon A, mosaka usab ang inadlawng suhol ngadto sa ₱582, gikan sa kanhing ₱540.
Dugang pa niini, ang binulan nga suhol sa mga kasambahay sa tibuok rehiyon mosaka ngadto sa ₱7,500, gikan sa kanhing ₱7,000.
Ang pagtaas sa suhol gisugyot sa Regional Tripartite Wages and Productivity Board VII ug giaprobahan sa National Wages and Productivity Commission human sa saktong pagpakigkonsulta sa mga representante sa mga trabahante, mga amo, ug ubang sektor.
Napatik ang maong sugo niadtong Septiyembre 28 ug nahimong epektibo 15 ka adlaw human sa pagpagawas niini kaniadtong Oktubre 14, 2026. (RTB)
