GIPASALIG sa National Irrigation Administration (NIA-7) nga adunay igong suplay sa tubig ang mga dam sa Bohol para sa irigasyon bisan pa sa gikabalak-ang kusog nga El Niño.
Sumala ni Bohol Integrated Irrigation System (BIIS) Head Engr. Beverly Joy Pocot-Cadorna uban sa Bohol-Cebu-Siquijor Irrigation Management Office Engineering and Operations Section Chief Evaristo Borja nga wala pa maapektuhi sa El Niño ug adunay igong suplay sa tubig ang mga dagko ug gagmay’ng dam sa probinsya. Bisan og ni-epekto na ang El Niño, dako og natabang ang nasinati nga mga pag-ulan nga nakapondo og tubig sa mga dam.
Matod sa NIA-7, ang duha ka dagkong dam — ang Malinao Dam sa Pilar ug ang Bayongan Dam sa San Miguel nga maoy kinadak-ang dam sa Bohol — nakahatag og tubig-irigasyon ngadto sa gibana-bana nga 5,000 ka ektarya nga kaumahan sa humay sa mga lungsod sa Pilar, Dagohoy, ug mga bahin sa San Miguel, Ubay, ug Alicia. Ang Malinao Dam gidisenyo aron ibalhin ang tubig ngadto sa Bayongan Dam kung ang lebel sa tubig niini moabot na sa 151.6 metros ibabaw sa lebel sa dagat.
Si Engr. Borja mibutyag nga posibleng maapektuhan ang mga lugar nga giserbisyohan sa Ilaya Dam ug Capayas Dam sa Ubay. Ang NIA nagpadayon sa pag-ayo sa gate valve nga gipaabot mahuman karong Disyembre. Nagdumala usab ang NIA og mga Small Reservoir Irrigation System nga nagserbisyo sa gatusan ka ektarya nga kaumahan sa humay sa maong probinsya.
Gitugotan usab sa NIA ang UWASCO o Ubay Water Services Cooperative nga makakuha og tubig gikan sa Capayas Dam para sa ilang mga konsumidor. Tungod sa nasinati nga El Niño, giawhag sa NIA ang mga irrigators association sa paghimo og double cropping o pagtanom og mga lagutmon gawas sa humay alang sa seguridad sa pagkaon. (RTB)
