GISUGYOT ni House Minority Leader Marcelino “Nonoy” Libanan ang pagtukod og tulo ka permanenteng koneksyon tali sa mga isla sa Visayas pinaagi sa tulay o undersea tunnel, lakip ang mga proyekto nga direktang makaapekto sa konektibidad sa Bohol.
Pinaagi sa House Bills No. 11499, 11500 ug 11501, gitumong ni Libanan nga matun-an ang posibilidad sa pagtukod og permanenteng koneksyon tali sa Cebu ug Negros Oriental, Cebu ug Bohol, ug Bohol paingon sa Southern Leyte.
Partikular sa Bohol, ang House Bill No. 11500 nagtinguha sa pagdugtong sa Getafe, Bohol ug Cordova, Cebu pinaagi sa tulay o undersea tunnel. Samtang, ang House Bill No. 11501 nagproponer sa koneksyon tali sa Ubay, Bohol ug Maasin City sa Southern Leyte pinaagi sa Lapinig Island.
Matud ni Libanan, ang maong mga proyekto gitumong aron mapadali ang pagbiyahe sa mga tawo ug pagtransportar sa mga produkto, ingon man mapalapad ang access sa trabaho, serbisyo ug ubang oportunidad sa ekonomiya.
Gipasabot usab niya nga ang permanenteng koneksyon tali sa mga isla mahimong alternatibong agianan sa mga emergency responder, relief goods ug uban pang importanteng suplay panahon sa pagkabalda sa biyahe sa mga barko, depende sa kahimtang sa lugar.
Apan, giklaro ni Libanan nga kinahanglan una ang komprehensibong feasibility studies aron matino kon mahimo ba sa teknikal, ekonomikanhon ug environmental nga aspeto ang maong mga proyekto.
Ang pondo alang sa feasibility studies ug engineering designs gisugyot nga iapil sa tinuig nga General Appropriations Act o GAA, uban sa posibilidad nga mangayo og teknikal nga tabang o grant funding gikan sa mga international development partners.
Sa pagkakaron, balaudnon pa lamang kini ug wala pa magpasabot nga aprubado na ang pagtukod sa maong mga tulay o undersea tunnels.gas station sa Barangay Ubujan. (RTB)
