GISUGYOT sa Regional Development Council-7 (RDC-7) kang Presidente Ferdinand Marcos Jr. nga ideklarar ang kahimtang sa emerhensya sa suplay sa kuryente sa Cebu ug Bohol tungod sa padayon ug balik-balik nga kakulang sa kuryente sa Visayas Grid.
Ang maong hangyo pormal nga gi-aprobahan atol sa ikatulong tinuig nga tigtom sa tibuok konseho nga gipahigayon sa Carcar City Hall niadtong Septiyembre 30, 2026.
Ang resolusyon nagtumong sa pagpadali sa pagpatuman sa mga dali ug hamubo nga panahon nga lakang aron masulbad ang kakulang sa suplay, mapaspasan ang pagtukod ug pagpalapad sa mga planta sa kuryente, ug mapadali ang mga prayoridad nga proyekto sa transmisyon ug estasyon sa kuryente nga gipangulohan sa National Grid Corporation of the Philippines (NGCP).
Gipangulohan ni Gobernador Pamela Baricuatro, nga mao usab ang pangulo sa RDC-7, ang maong tigom diin ang resolusyon gi-aprobahan pinaagi sa hiniusang pagtugot sa tanan.
Gipahibalo ni Jennifer Bretaña, direktor sa Department of Economy, Planning, and Development (DEPDev), nga ang mga konseho sa kalambuan sa Kasadpan ug Sidlakang Visayas gilauman usab nga mosagop og susamang resolusyon. Si Baricuatro usab ang nangulo sa hiniusang grupo sa Visayas, diin gikonsiderar ang nagkahiusang paghangyo sa tibuok rehiyon ngadto sa Malacañang.
Matud pa ni Bretaña, kung ideklarar na sa Presidente ang kahimtang sa emerhensya, mas dali makahimo ang Department of Energy (DOE) sa mga lakang aron mapauswag ang suplay, makadasig sa mga pribadong negosyante nga mamuhunan sa mga bag-o ug gipalapdan nga mga planta, ug mapaspasan ang pagtapos sa mga proyekto sa linya ug estasyon sa kuryente nga gilauman pa nga sugdan.
Nagpadayon ang kabalaka sa mga lokal nga pamunoan ug mga grupo sa negosyo tungod sa kanunay nga pagkawala sa kuryente. Ang paghunong sa dagkong mga planta, gikatakdang pag-ayo, ug pagkunhod sa kapasidad sa pagmugna og kuryente mao ang hinungdan sa pagkagamay sa magamit nga suplay.
Niadtong Septiyembre 28, gipailalom pag-usab sa yellow alert ang Visayas Grid. Ang magamit nga kapasidad niadtong panahona nagkantidad lamang og 2,572 megawatts (MW), samtang ang kinatas-ang panginahanglan miabot sa 2,374 MW — nagbilin lamang og 198 MW nga sobrang suplay. Tulo ka dagkong planta sa kuryente gikan sa karbon ang wala nag-operate niadtong panahona. (RTB)
