GIBANABANA nga moabot sa ₱8.00 kada litro ang pagkunhod sa presyo sa diesel sa umaabot nga martes, Septyembre 29 sumala sa resulta sa unang tulo ka adlaw sa pagnegosyo sa langis sa kalibotan.
Gipaabot usab ang pagkunhod sa presyo sa gasolina nga mokabat sa ₱1.00 kada litro, samtang ang kerosene mokunhod og ₱7.00 kada litro.
Matod sa Department of Energy (DOE), ang gipaabot nga pag-ubos sa presyo nalambigit sa pahibalo sa Saudi Arabia nga ibalik na ang operasyon sa produksiyon — mokabat sa 4 milyones hangtod 5 milyones ka baril — gikan sa East-West Petroline ug Yanbu export facility.
Bisan pa man niini, gipasabot sa ahensya nga dili pa pinal ang gihisgutang kantidad. Ang tinuod nga kantidad magdepende pa sa lihok sa presyo sa krudo sa kalibotan ug sa kusog sa piso batok sa dolyar sa nahibiling mga adlaw sa pagnegosyo.
Ang pinal nga pahibalo sa pagbag-o sa presyo sa petrolyo ipagawas human makompleto ang tibuok semana nga pagnegosyo sa langis. (RTB)
