PADAYON ang kusganong pagduso sa Probinsya sa Bohol isip usa sa mga nag-unang destinasyon sa mga langyaw nga turista, human gianunsyo ni Gobernador Erico Aris Aumentado ang pag-abot sa dugang direct charter flights gikan sa Japan.
Matod sa Gobernador, kini nga kalamboan bunga sa malampusong negosyo ug misyon sa turismo sa nasud — diin nakakuha sa labing-unang direkta nga biyahe gikan sa Narita paingon sa Bohol-Panglao International Airport. Aduna nay dugang nga mga biyahe nga gikatakda karong umaabot nga Disyembre ug sa unang kwarter sa 2027 — tin-aw nga timailhan sa maayong pagtinabangay sa kagamhanan ug sa tanang hingtungdan sa turismo.
Sa pagdako sa gidaghanon sa mga bisita, gipahinumdom sa Gobernador ang importansya sa pagpanalipod sa kinaiyahan:
“Magpadayon kita sa pagpasiugda sa malungtarong turismo aron mapreserbar nato ang natural nga katahum sa atong probinsya ug mapabilin kini alang sa umaabot nga mga henerasyon.”
Gipasigarbo usab niya nga ang Bohol adunay daghang nindot ug barato nga mga dapit nga bisitahon — haum sa nagkalain-laing gusto ug badyet sa mga lokal ug langyaw nga bisita.
Dungan niini, nanawagan ang Gobernador sa publiko nga ipaabot ang ilang mga kabalaka ug reklamo sa saktong buhatan aron masulbad dayon:
“Kung adunay mga problema o nakitang kulang, palihog ipahibalo sa atong buhatan — sa Office of the Governor o sa Bohol Provincial Tourism Office — aron mahatagan kini dayon og angay nga aksyon. Magtinabangay kita sa pag-atiman, pagpalambo, ug pagpanalipod sa atong gimutya nga probinsya.” (RTB)
