MALIPAYONG gidawat sa Diocese of Tagbilaran ang pagbalik ni Bishop Crispin Barrete “Bai” Varquez isip ika-8 nga Obispo sa diyosesis, human siya pormal nga itudlo ni Pope Leo XIV sa maong katungdanan.
Si Bishop Varquez anak sa diosesis sa Tagbilaran — dinhi niya gisugdan ang iyang tibuok pagpanaw sa pag-alagad: gikan sa pagka-estudyante sa seminaryo, pagkapari, pagporma sa mga umaabot nga pari, pagka-parokyal nga pari, hangtod nga nahimo siyang Vicar General sa tibuok diyosesis.
Natawo siya niadtong Disyembre 5, 1960 sa lungsod sa Sevilla, Bohol. Nagtuon siya og Pilosopiya sa Immaculate Heart of Mary Seminary dinhi sa Tagbilaran, ug Teolohiya sa St. Augustine Major Seminary sa Tagaytay, Cavite. Gi-orden siya isip pari niadtong Abril 14, 1989.
Ang iyang unang buluhaton isip pari didto sa Mindoro isip Assistant Parish Priest. Misunod niini ang iyang pagserbisyo isip tighimugso sa mga seminarista sa seminaryo dinhi sa Tagbilaran ug sa Tagaytay gikan sa dekada 1990 hangtod 2000. Human niini, nahimo siyang Parokyal nga Pari sa nagkalain-laing parokya sa Bohol, ug niadtong Enero 2007, gitudlo siya isip Vicar General sa diyosesis.
Niadtong Agosto 4, 2007, gitudlo siya isip Obispo sa Diocese of Borongan sa Eastern Samar, diin nagserbisyo siya sulod sa duha ka dekada isip ikaunom nga Obispo sa maong lungsod.
Karon, mobalik siya sa Tagbilaran — diin nagsugod ang iyang pagpanaw — isip ika-8 nga Obispo sa tibuok diyosesis. Gipahayag sa Diocese of Tagbilaran nga ang iyang pagbalik dili lamang usa ka bag-ong katungdanan, kondili usa usab ka pagpauli sa kaugalingong anak sa Simbahan sa Bohol.
Isip bag-ong Obispo, gitahasan siya sa pagpanguna, pagtudlo, ug pag-atiman sa espirituhanong panginahanglan sa milyon-milyong mga Katoliko sa tibuok diyosesis. Nanawagan ang diosesis sa tanan nga iyang kauban sa pag-ampo aron hatagan siya sa Ginoo og kaalam, kusog, kaisog, ug kalipay sa iyang bag-ong misyon. (RTB)
