GISUGYOT ni Board Member Romulo Cepedoza, Chairperson sa Committee on Health sa Sangguniang Panlalawigan, ang paghimo og emergency purchase sa anti-venom aron masiguro ang igong suplay niini alang sa mga pasyenteng mapaakan og bitin sa tibuok probinsya.
Migawas kini isip gikatakdang hisgutan sa tigom sa komite, human sa panawagan ni Board Member Mutya Tirol Macuno alang sa dinaliang imbestigasyon kalabot sa bag-ong kaso sa pagkamatay sa usa ka bata nga napaakan og banakon sa lungsod sa Loon.
Gihangyo ni Cepedoza nga dali-on ang imbestigasyon aron mahibaw-an kung igo ba ang suplay sa mga tambalanan — ilabina ang mga gikinahanglang tambal ug gamit medikal alang sa mga kaso sa paak sa bitin, lakip na ang anti-venom.
Matud niya, kon mapamatud-an nga kulang o walay suplay sa maong tambal, mahimo dayong aksyunan ang dinaliang pagpalit aron malikayan ang dugang nga peligro sa kinabuhi sa mga masakiton.
Gipasabot usab nga tungod sa nagpadayong kainit sa panahon, mas daghan ang mga bitin nga nagapanggawas sa ilang gipuy-an, nga nagadugang sa risgo sa kaluwasan sa publiko. (RTB)
