ANG tumong ni Gobernador Aris Aumentado alang sa Ubi Kinampay sa Bohol dili lamang ang pagtipig sa maong lumad nga klase sa ubi nga buhi, kondili ang pagpalig-on pa sa posisyon sa Bohol isip nag-una nga prodyuser sa ubi ug pagtukod og mas lig-on ug mas kompetitibong industriya gikan niini.
Aron matuman kini, gipunting ang mga pundasyon sa produksiyon — mas maayong pamaagi sa pagpananom, mas lawom nga kahibalo sa mga mag-uuma, panukiduki, pagpalambo sa merkado, ug ang pagpanalipod sa talagsaong kinaiya sa Ubi Kinampay.
Tungod niini, gipasaka na usab sa probinsya ang hangyo alang sa Geographical Indication (GI) Protection aron masiguro nga ang Ubi Kinampay magpabilin nga tinuod nga produkto sa Bohol ug dili masundog gikan sa ubang dapit.
Kabahin sa maong lakang ang pagbansay ug pagtuon nga gipahigayon niadtong Setyembre 3 sa Barangay Looc, Panglao. Gipangulohan kini ni Provincial Agriculturist Liza M. Quirog, MNSA, ug ni Municipal Agriculturist Rojiene Sedillo, PhD. Didto, ang mga mag-uuma nagtinabangay sa pag-ila sa tinuod nga kinaiya sa Ubi Kinampay, pagtuon sa naandang pamaagi sa pagpananom, ug sa saktong paggamit sa organikong abono.
Gipasabot nga ang tinuod nga pagpalambo sa industriya sa ubi magsugod sa mga mag-uuma nga nag-ugmad niini. Ang pagpalig-on sa kahimtang sa uma mao ang sukaranan sa pagtukod sa Ubi Kinampay nga gipangandoy sa Gobernador alang sa kaugmaon sa Bohol. (RTB)
