KARONG daghan nang mga tawo ang nakagawas-gawas tungod sa paglibkas na sa kadaghanan sa mga restriksyon dala sa Covid-19, naa na sab ang daghang mga ilegalista ug badlungon sa katilingban nga nagpaabot lang makabinta aron mamiktima.
Tungod niini, gidasig ang publiko nga magbinantayon kun sila naa sa mga pampublikong lugar ug likayan ang pagbandera sa ilang mga cellphone ug pagsul-ob og mahalon nga mga alahas ug uban pa.
Ang bag-ong napili nga bise-gobernador sa Bohol Dr. Dionisio Victor Blaite, Ph.D mipasidaan niini tungod kay nagbaha na ang mga tawo sa kadalanan karon.
Sumala ni Balite nga kini human gitugotan na sa Inter-Agency Task Force (IATF) ang 100 % nga kapasidad sa mga establisamento sa mga lugar nga ubos Alert Level 1 busa normal lang gyud ang pagbaha sa mga tawo.
Ang pagmatngon kanunay unta maoy ipatigbabaw ug kon dunay dili maayong butang nga mahitabo ireport kini dayon sa kapolisan aron maaksyonan dayon, sigon sa bag-ong bise-gobernador.
Giawhag niya ang mga opisyales sa barangay sa Bohol nga monitoron pud kun dunay mga dayo sa ilang dapit nga kadudahan ang mga lihok ug ipahibalo kini sa kapolisan. (RTB)
