NAKATAKDANG mupagawas ang Land Transportation Office (LTO) og schedule alang sa pagpanghatag sa kapin 65 mil ka mga plaka sa sakyanan nga gipadala na dinhi sa Bohol sa milabay nga semana.
Matod ni LTO-7 regional director Victor Caindec nga mopahigayon siya og press conference aron pagpahibawo sa mga petsa sa issuance niini sa higayon nga makamugna na sila og distribution system nga dili magresulta og kahuot sa Tagbilaran City Hall diin atua gipahiluna ang mga plate numbers.
Dugang ni Caindec nga gi-finalize nila uban sa LTO chief sa Tagbilaran nga si Yvonne Auza ug sa Tagbilaran City government ang sistema aron dili maghuot ug magkagubot sa distribution area.
Niadtong milabayng semana ang LTO sa rehiyon 7 mipadala sa mokabat 65,821 ka license plates sa mga sakyanan nga anhi na ipanghatag sa Bohol imbes nga adto i-claim sa Cebu sa mga tag-iya sa sakyanan.
Gikonsidera sa LTO nga ipagawas ang plate number base sa buwan ug tuig sa pagparehistro sa sakyanan ug ang mga tag-iya niini maoy tugotan nga maka claim sa maong higayon. (RTB)
