NAPULO ug unom ka libo ka tawo ang nadugang sa listahan sa mga nabakunahan batok sa COVID-19 sa Bohol sa milabay nga napulo ka adlaw.
Subay sa taho sa Bohol Inter-Agency Task Force on the Management of Emerging Infectious Disease (BIATF), nga gipagawas niadtong Hunyo 6, kinatibuk-ang 16,309 ka Bol-anon ang natupokan sa bakuna sa bisan hain man nga dose batok sa COVID-19 gikan Mayo 27 hangtud Hunyo 6.
Niini nga kadaghanon, 6,146 ka Bol-anon nga eligible alang sa bakuna ang nakakuha sa ilang ikaduha ug pangkompleto nga tupokan batok sa COVID-19.
Kini usab nga kadaghanon mipasaka sa vaccination coverage sa Bohol ngadto na sa 72.12% sa 1,106,084 nga gitumbok nga maoy 80% sa local nga populasyon.
Kini nagpadugang sa .55% nga pagsaka sa mga nabakunahan gikan sa 71.57% sa milabay nga Mayo 27, segun sa susamang taho.
Sa mga unang nakakuha sa bakuna, mikabat na sila sa 724,152, o nadugangan og 6,416 gikan sa katapusang ihap.
Subay usab gihapon sa sugyot sa mga batid sa pagdumala sa sakit mananakod, sa gikinahanglan nga booster alang niadtong mga sakop sa katilingban nga nanarbaho sa mga lugar nga may delikado nga posibilidad nga matakdan, 3,083 ang labing bag-o nga nabakunahan, ug karon miabut na ang kinatibuk-ang kadaghanon ngadto sa 90,388.
Gani, dinhi sa Bohol, mikabat na sa 564 ka mga tawo ang nakakuha sa ikaduha nga booster shot, alang sa mga nanginahanglan niini. (RAHC/PIA7 Bohol)
