HUMAN siya napili og giproklamar isip sunod nga Gobernador sa Bohol, gapadayon ang pagpangamdam ni Kongresista Erico Aristotle “Aris” C. Aumentado sa Segundo Distrito alang sa iyang pagpanumpa isip punong ehekutibo sa probinsiya ug sa umaabot na Sandugo Festival 2022 samtang gapadayon sa iyang mga katungdanan isip kongresista sa Segundo Distrito sa nahibilin nga panahon sa iyang ulahing termino.
Gi-organisar ni Aumentado ang usa ka Inauguration Committee nga maoy manguna sa mga kalihukan aron mamahimong malampuson ang Inauguration Day. Kini gipanguluhan ni Mr. Metodio Maraguinot Jr., ug nakigkita na usab ang pundok sa nagkalain-laing opisina sa Kagamhanang Probinsiyal alang sa koordinasyon kabahin sa maong panghitabo. Pagabuhaton ang inagurasyon ni Aris sa Bohol Cultural Center, Siyudad sa Tagbilaran karong Hunyo 30, 2022.
Naglihok kauban sa Transition ug Inauguration Committees ang 2022 Sandugo Committee nga maoy naglihok alang sa mga aktibidad sa umaabot na Sandugo Festival 2022, nga pagabuhaton sa tibuok probinsiya. Alang karong tuiga, ang tema mao ang “Hiniusang Paglantaw: Abante Sa Bag-ong Ugma,” nga magpakita sa importansya sa panaghiusa sa tanang Bol-anon ug pag-irog isip usa ka pundok sa tawo ubos sa usa ka maayong pagdumala ngadto sa hayag nga kaugmaon. Nipagawas usab sila og bag-ong logo, nga nagpakita og bag-ong pamaagi sa panglantaw sa mao nga kalingawan.
Gimanduan ang duha ka mga komitiba nga mubuhat sa tanang mga kalihukan nga gikinahanglan aron matuman ang tanang gikinahanglan alang sa Inauguration ug 2022 Sandugo Festival.
Nakigkita usab siya sa nagkalain-laing executives sa mga kompanya sama sa MVP Group of Companies ni Manny V. Pangilinan ug HGS HealthCare alang sa possible nga mga oportunidad sa probinsiya, nga makatabang aron madugangan ang mga trabaho alang sa mga Bol-anon.
Samtang gapadayon pa ang mga pagpangandam alang sa iyang paglingkod isip gobernadora, gapadayon gihapon ang iyang pagtuman sa mga responsibilidad sa iyang mga konstituwente sa Segundo Distrito pinaagi sa pagbisita sa nagkalain-laing barangay ug pag-apil sa nagkalain-laing groundbreaking ug turnover sa mga development projects, sama sa bag-ong waterworks system nga nagkantidad og kapin Php33,000,000 ug pagsemento sa mga dalan nga nagkantidad og Php50,000,000 sa Lungsod sa Dagohoy, Bohol. (PR/jja)
