NAHIDANGAT ang imahe sa Sto. Niño de Cebu sa Tagbilaran City niadtong Huwebes, Hunyo 9 isip kabahin sa tour nga gihimo sa pagsaulog sa 500 ka tuig sa Kristiyanismo sa Pilipinas.
Gidawat ni Bishop Abet Uy sa Diocese of Tagbilaran sa St. Joseph’s Cathedral ang imahen nga gikan na sa Diocese of Talibon sukad niadtong Mayo 12.
Matod ni Rev. Fr. Nelson Cerda, rector sa Basilica Minore del Sto. Niño de Cebu, mao kini ang unang higayon nga ang imahen nibiyahe gawas sa Sugbo sukad nagsugod ang pandemya niadtong 2020.
Matud ni Cerda nga ang tour gituyo aron sa pagpakatap sa debosyon sa Sto. Niño ug pagtabang pagpalig-on sa pagtuo nga Katoliko.
Ang katuyuan mao ang pagpakaylap sa debosyon ni Sr. Sto Niño ug aron madasig ang mga tawo nga moapil sa mga kalihokan sa Simbahan ug magpalig-on ang pagtuo, matod niini.
Human sa duha ka adlaw nga pagpabilin niini sa St. Joseph’s Cathedral, ang Sto. Niño image mosuroy sa nagkadaiyang mga parokya ubos sa Diocese of Tagbilaran.
Gidala kini sa Parokya sa Lindaville kaniadtong Biyernes ug sa Barangay Dao kagahapon Sabado, Hunyo 11.
Karong adlawa Domingo, ang imahen isuroy sa usa ka motorkada nga moagi sa K of C, mga barangay sa Cogon ug Manga sa Tagbilaran City ug Lapaz sa Cortes.
Sa sunod semana, ang hulagway dad-on sa mosunod nga mga dapit: Hunyo 13 – Maribojoc ug Cuasi, Loon; Hunyo 14 hangtod 15 – Sandingan Island, Loon; Hunyo 15 – Catagbacan, Loon; Hunyo 16 – Calape; Hunyo 17 – Panggangan; Hunyo 18 – Cahayag, Tubigon; Hunyo 19 – Clarin; ug Hunyo 20 hangtod 21 – Tubigon.
Ang imahe ibalik sa Cebu sa sunod semana Hunyo 21, 2022 agi sa Puerto sa lunsgod sa Tubigon. (RTB)
