TULO ka pampublikong eskwelahan gikan sa lalawigan sa Bohol ang pilion nga mo-representar sa tibuok nasud sa umaabot nga World Robot Olympiad (WRO) International Final 2026, nga pagahimuon sa San Juan, Puerto Rico karong Disyembre 8 hangtod 10 niining tuiga.
Ang napiling mga eskwelahan mao ang JAPeR Memorial High School sa Sagbayan, San Jose National High School sa lungsod sa Talibon, ug Ubay National Science High School sa Ubay.
Ang WRO giila isip usa sa pinakadagkong kalihokan sa kalibutan bahin sa Siyensya, Teknolohiya, Inhenyero, ug Matematika o STEM. Ang tema karong tuiga mao ang “Robots Meet Culture,” nga nagtumong sa pagdasig sa mga batan-ong imbentor sa paggamit sa teknolohiya ug robotics aron mapasidunggan, mapanalipdan, ug mapalambo ang kabilin, arte, ug tradisyon sa matag nasud.
Tungod niini, nangayo og pinansyal nga tabang ang DepEd Bohol atubangan sa Komite sa Edukasyon sa Sangguniang Panlalawigan, nga gipangulohan ni Board Member Nathaniel Binlod, aron matabonan ang gasto sa pagbiyahe ug uban pang gikinahanglan sa mga estudyante.
Gidayeg ni Binlod ang kadaugan ug kakusog sa mga estudyante ug nagpahayag sa iyang tibuok nga pagsuporta sa ilang pag-apil. Bisan pa man niini, tungod sa limitadong pondo nga anaa sa Kapitolyo, miingon si Binlod nga iyang ipasang-at ang usa ka resolusyon aron hangyoon ang Kalihim sa DepEd nga maghatag og dugang nga tabang pinansyal alang sa pag-apil sa mga internasyonal nga kompetisyon, ilabi na sa robotics ug uban pang kalihokan sa STEM.
Matod pa ni Binlod, talagsaon ug dakong higayon kini alang sa mga estudyante sa Bohol, kay dili kasagaran nga ang mga pampublikong eskwelahan makasulod ug makatigum og kusog aron makig-indigay sa internasyonal nga ang-ang. Ang maong pag-apil dili lamang higayon aron mapakita ang ilang kahibalo ug talento, kundili dakong kahigayonan usab aron mapasidunggan ang ngalan sa Bohol ug sa tibuok nasud sa atubangan sa kalibutan. (RTB)
