GILAUMAN nga opisyal nga mag-abli sa sunod buwan ang bag-ong Robinsons Supermarket sa lungsod sa Panglao, Bohol. Kini ang gipadayag ni Gobernador Erico Aristotle “Aris” Aumentado pinaagi sa iyang opisyal nga pahina sa Facebook.
Ang pag-abli sa maong bag-ong establisemento gilauman nga makadugang sa mga kapilian sa mga lumulupyo ug sa mga bisita ug turista sa pagpamalit sa ilang adlaw-adlaw nga panginahanglanon.
Wala pa gipahibalo sa Gobernador ang tukmang adlaw ug petsa sa opisyal nga pag-abli niini.
Ang maong pinaka-unang sanga sa Robinsons Supermarket sa tibuok lalawigan sa Bohol nahimutang sa Bellemar Lifestyle Center sa Barangay Tawala, lungsod sa Panglao — nga maoy sentro sa turismo sa maong isla. (RTB)
