NAG emergency meeting ang Incident Management Team sa Valencia, Bohol niadtong Agosto 19, 2026 aron hisgutan ang mga insidenteng nahitabo sa pipila ka mga eskwelahan ug ang mga lakang aron mapalig-on ang seguridad ug kaluwasan sa mga estudyante ug personnel.
Gipunting sa miting ang mga safety precautions nga gipangbuhat sa Valencia Technical-Vocational High School (VTVHS), Anas High School, MPOLMHS ug Anoyon High School aron malikayan ang pagbalik sa susamang mga insidente ug masiguro ang kahapsay sulod ug palibot sa mga eskwelahan.
Mitambong sa maong miting sila Mayor Dionisio Neil A. Balite, J.D., Ph.D.; Vice Mayor Aristotle Cometa; Kagawad Jerald Portrias; ABC President Dr Elsa B. Galacio; ug mga school officials nga sila Dr Marychel Laguitao, bag-ong na-appointed nga Public Schools District Supervisor ug Principal IV sa VTVHS; Evelyn Cirujales, SIC sa Anas High School; Jesus T. Adem, SIC sa Anoyon High School; ug Albert P. Butad, SIC sa MPOLMHS.
Apil usab sa miting ang mga representante gikan sa nagkalain-laing ahensya ug opisina, lakip ang BFP, MDRRMO, Philippine Army, MSWD, MENRO, Municipal Engineering Office, MAO, PNP, Philippine Coast Guard, Barangay Officials ug ABC.
Gipakita sa maong koordinasyon ang panaghiusa sa lokal nga pangagamhanan, mga eskwelahan ug nagkalain-laing ahensya sa pagpalig-on sa seguridad ug pagpanalipod sa mga estudyante ug personnel sa mga eskwelahan sa Valencia.
Tumong sa Incident Management Team nga masiguro nga adunay klarong koordinasyon ug andam nga mga lakang sa matag insidente aron mapadayon ang luwas ug hapsay nga palibot alang sa edukasyon.
