OPISYAL nang giaprobahan sa World Bank niadtong Hulyo 31, 2026 ang dako nga pautang nga mokabat sa $268.2 milyon alang sa proyekto sa panubig ug sanitasyon nga mosakop sa probinsya sa Bohol, ingon man sa mga isla sa Siargao ug Jolo.
Ang proyekto nga gitawag og Philippines Accelerated Water and Sanitation Project in Selected Areas (AWSPSA) adunay kinatibuk-ang kantidad nga $268.62 milyon — diin ang $250.87 milyon gikan sa pautang sa World Bank, ug ang nahabilin gikan sa pondo sa nasudnong gobyerno ug pribadong sektor. Tumong niini nga mapalapdan ang pag-access sa luwas ug kasaligan nga suplay sa tubig, mapaayo ang serbisyo sa mga lokal nga tighatag niini, ug tukuron ang mga imprastraktura nga makasugakod sa epekto sa pagbag-o sa klima.
Ang DPWH ug DILG ang magdumala sa pagpatuman niini. Gilauman nga makamugna kini og 8,700 ka trabaho sulod sa lima ka tuig sa panahon sa pagtukod, ug motubo pa ngadto sa 46,500 ka oportunidad sa trabaho sulod sa 25 ka tuig nga pagpadagan niini.
Ang tulo ka dapit gipili base sa seryoso nga panginahanglan sa tubig, pagkahuyang sa katalagman sa klima, ug kaandam sa mga lokal nga kagamhanan sa pagtinabangay.
Kini mao ang unang dakong proyekto sa nasud nga naglangkob sa tibuok proseso — gikan sa pagpangita ug pag-amping sa tinubdan sa tubig, pag-apod-apod niini, hangtod sa saktong pagdumala sa sanitasyon ug hugaw.
Dili lang kini makabenepisyo sa adlaw-adlaw nga panginahanglan sa mga pamilya, kondili makapalig-on usab sa turismo, edukasyon, ug serbisyong panglawas sa probinsya. Kini usab ang unang lakang sa mas lapad nga plano sa World Bank aron masiguro ang kasegurohan sa tubig ug kalig-on sa mga komunidad sa tibuok rehiyon sa East Asia ug Pacific. (RTB)
