GIDEKLARAR sa Bohol Light Company, Inc. (BLCI) nga suspindido una ang gitakdang pagkolekta sa bill deposit adjustment ngadto sa mga konsumidor sa Tagbilaran City, hangtod sa sunod nga pahibalo.
Gipasabot kini ni BLCI Chief Operating Officer nga si Paulino Almedilla atubangan sa sesyon sa Sangguniang Panlungsod nga gipangulohan ni Vice Mayor Adam Relson Jala niadtong Huwebes, Agosto 6.
Kinsa ang nasakop sa suspensyon? Libre sa kolekta: Mga konsumidor kansang pinakaulahing bayranan nasulod sa Hulyo 24 hangtod 31, 2026 nga panahon sa pagkwenta.
Sugdan na ang kolekta: Kadtong gipahibawo na sa wala pa ang Hulyo 24 – apan mahimo kining bahinbahinon sa lima (5) ka buwang installment nga idugang sa sunod nga lima ka binulan nga bayranan.
Rason ug Legal nga Basehanan: Ang kalihokan gihimo subay sa ERC Resolution No. 03, Series of 2006 o ang giusab nga Magna Carta for Residential Electricity Consumers – apan giklaro nga dili kini mandatory o pugos nga buhaton.
Gidapit ang mga opisyal sa BLCI human sa mosyon ni Konsehal Edi L Borja, tsirman sa Committee on Energy, aron ipasabot sa konseho ang rason, basehanan ug tumong sa maong kalit nga kausaban.
Kauban ni Almedilla sa pagtubag mao si BLCI Customer Care Assistant Manager Sheryl Paga. (RTB)
