NANAWAGAN si Bohol Governor Erico Aristotle “Aris” Aumentado og mas lig-on nga koordinasyon uban sa Department of Environment and Natural Resources (DENR) Rehiyon 7 aron mapaspas ang paghatag sa mga kinahanglanong dokumento ug pagtugot alang sa mga prayoridad nga proyekto sa lalawigan.
Gipangulohan sa gobernador ang mga opisyal sa probinsya ug mga representante sa tulo ka distrito sa Kongreso sa ilang pakigtagbo sa mga opisyales sa DENR aron hisgutan ang pagpasayon sa proseso sa mga permit sama sa Environmental Compliance Certificate (ECC) ug clearance gikan sa Protected Area Management Board (PAMB).
Mitambong sa maong tigom sila First District Rep. John Geesnell “Baba” Yap II, Second District Rep. Vanessa “Van-Van” Aumentado, ug Third District Rep. Alexie Tutor. Sa bahin sa DENR ug mga kaubang ahensya, atubangan usab sila ni Regional Executive Director Laudemir Salac sa DENR-7, Mines and Geosciences Bureau-7 Regional Director Al Emil Berador, EMB-7 representante Rosalina Gaterin, PENRO-OIC Wilson Henson, CENRO Tagbilaran Chief Edgar Ricafort, ug CENRO Talibon Chief Glicerita Racho.
Gipasabot ni Aumentado nga ang pagka-ulah sa mga proseso mahimong makapalangan sa paghatag sa serbisyo ug benepisyo nga gitumong alang sa mga Bol-anon. Tungod niini, mitanyag ang gobyerno sa probinsya nga maghatag og dugang kawani alang sa CENRO Tagbilaran, CENRO Talibon ug sa Environmental Management Bureau aron makahimo og “express lane” alang sa mga proyekto sa kagamhanan.
Gipasiguro usab sa gobernador nga bisan pa man sa pagpadali sa mga pamaagi, dili isalikway ang saktong pagsunod sa mga lagda ug pagpanalipod sa kinaiyahan. Matud pa niya, ang mas suod nga pakigtambayayong makatabang aron mas sayong matuman ang mga proyekto samtang gisiguro ang malungtarong kalamboan ug responsableng pag-atiman sa kinaiyahan. (RTB)
