MOKABAT sa ₱81.8 milyones nga balor sa iligal nga droga ang opisyal nang gipawong ug gisunog pinaagi sa thermal destruction niadtong Hulyo 28, 2026 sa usa ka akreditadong pasilidad dinhi sa dakbayan sa Cebu.
Personal nga misaksi sa maong kalihokan si Police Major Joseph F. Lopena, hepe sa Police Community Affairs and Development Unit (PCADU), diin gilabay sa siga ang kinatibuk-ang 12,040.55 gramos nga methamphetamine hydrochloride o mas nailhan nga “shabu.” Ang maong mga ebidensya nakuha gikan sa nagkalainlaing operasyon sa tibuok lalawigan sa Bohol ug ubang bahin sa Rehiyon 7.
Ang pagguba gihimo subay sa Section 21, Article II sa Republic Act No. 9165 o ang Comprehensive Dangerous Drugs Act of 2002 nga giusab sa RA 10640, ug sa mga direktiba gikan sa Dangerous Drugs Board (DDB). Tumong niini nga sigurohon nga dili na makabalik pa sa sirkulasyon o magamit pag-usab ang mga sakmitong butang.
Matod sa Bohol Police Provincial Office (BPPO), kini maoy bunga sa padayon nga kampanya batok sa droga uban sa PDEA Bohol, ubang ahensya sa pagpatuman sa balaod, ug sa suporta sa katawhan.
Sa iyang pahayag, gipasabot ni Provincial Director PCOL Patricio C. Degay Jr. ang kahinungdanon sa maong lakang: “Hunahunaa ang dakong kadaot nga unta mahatag niini sa atong mga pamilya kon wala kini masakmit. Ang atong paningkamot alang sa kaluwasan sa matag Bol-anon ug sa tibuok nasud.”
Padayon nga nag-awhag ang kapulisan sa publiko nga makigtambayayong ug dayon magpaabot sa bisan unsang kaduda-dudang kalihokan aron mapadayon ang kalinaw ug seguridad sa tibuok probinsya. (RTB)
