GIPADAYAG ni Gobernador Erico Aristotle “Aris” Aumentado nga ang Bohol dili lamang usa ka probinsya o dapit nga bisitahan sa mga turista, kondili usa ka tinuod nga panimalay diin nagsugod ang mga damgo, napanday ang mga mithi, ug kanunayng balikan sa kasingkasing sa matag Bol-anon bisan asa pa sila nahimutang.
Sa iyang mensahe atol sa opisyal nga pagsaulog sa ika-172nd Bohol Day sa Bohol Cultural Center karong adlawa, gihulagway ni Aumentado ang lalawigan isip yutang natawhan nga naghatag og pagkatawo ug paglaom sa mga lumad niini, bisan pa man og anaa na sila sa lain-laing bahin sa kalibutan.
Matud niya, ang katahom sa kinaiyahan sa Bohol—gikan sa mga kabukiran, kadagatan, huyuhoy sa hangin hangtod sa hayag nga kahayag sa kagabhion—mao ang mga handumanan nga nagpabiling buhi sa hunahuna ug naghatag og kaharuhay sa mga Bol-anon bisan layo sila sa ilang pamilya.
“Ang Bohol dili lang usa ka probinsya. Kini ang atong balay diin nagsugod ang atong istorya, naporma ang atong mga mithi, ug kanunayng makakaplag og dalan pauli ang atong kasingkasing,” matud pa sa gobernador.
Gipasabot usab ni Aumentado nga ang selebrasyon dili lamang paghinumdom sa pagkahimulag sa Bohol gikan sa Cebu 172 ka tuig na ang milabay, kondili dakong pagpasidungog usab sa lig-on nga panaghiusa ug panagbugkos sa tibuok katawhan.
Ang espiritu sa Sandugo—nga nagsimbolo sa panaghigalaay, pagsalig, pagsinabtanay ug kalinaw—nagpadayon nga naggiya sa lalawigan sa paghimo og mas daghang oportunidad alang sa tanan.
Gipahinumdoman usab sa gobernador nga ang tanang kalampusan sa Bohol dili bunga sa tagsa-tagsa ka paningkamot, kondili resulta sa hiniusang kusog sa mga Bol-anon bisan unsa pa ang mga hagit nga ilang giatubang.
Bisan pa sa padayon nga kausaban sa kalibutan, nagtuo si Aumentado nga magpabiling panimalay ang Bohol, ug giawhag niya ang tanan nga ipakita ang gugma sa probinsya pinaagi sa matinud-anong serbisyo ug pagbilin og maayong kabilin alang sa umaabot nga mga henerasyon.
Gitapos niya ang mensahe sa kusog nga pag-awhag: “Mabuhi ang tanang Bol-anon! Mabuhi ang atong Probinsya sa Bohol! Abante Bohol!” (RTB)
