WALAY grupong mouli nga pildi sa 2026 Sandugo Street Dancing ug Grand Showdown, kay ang tanang siyam ka partisipanteng lungsod makadawat og premyo. Dugang pa niini, ang matag lungsod hatagan og P1 milyon nga subsidy gikan sa Kagamhanan sa Probinsya aron masuportahan ang ilang pag-andam ug ensayo.
Ang kalihokan himoon karong adlawa Domingo, Hulyo 26: ang Street Dancing sa CPG Avenue, samtang ang Grand Showdown sa CPG Sports Complex.
Matod ni Emerson Pinos, pangulo sa Center for Culture and the Arts Development, ang kompetisyon karong tuiga tinuod nga usa ka “festival of festivals” diin ang matag lungsod nagpasundayag sa ilang talagsaong kultura, tradisyon, ug identidad. Mikabat sa 2,063 ka performers ang miapil isip kabahin sa selebrasyon sa Sandugo Festival.
Ania ang mga partisipante ug ang ilang gipasidungog nga pista: Antequera – Banay sa Magbubukad Piskaya (Basket Festival); Ubay – Pundok sa Nagkahiusang Ubaynon (Ubay-ubay Festival); Dimiao – Banay sa Kulturang Dimiaonon (Kuradang sa Lomboy Festival); Catigbian – Pundok Catigbawan (Catigbawan Festival); Maribojoc – Lumad Maribocjanon (Inting-Inting Festival); Alburquerque – Hacienderos de Alburquerque (Asin Tibook Festival); Valencia – Tribu sa Hamiling Sang-at (Sang-at Festival); Talibon – Tribu Matahom nga Talibon (Abundayon Festival); ug Loay – Banay Loaynon (Sambat Festival).
Mga Premyo: Grand Champion: P1,000,000; 1st Runner-up: P800,000; 2nd Runner-up: P700,000; 3rd Runner-up: P600,000; 4th Runner-up: P500,000; ug ang dili masulod sa Top 5: P300,000 consolation prize
Special Awards: Best in Street Dancing (P300,000), Best in Musicality (P100,000), Best in Production Design (P100,000)
Dugang pa niini ang Development Project Award alang sa mga mananaog.
Gipasabot sa mga organisador nga ang maong suporta dili lang alang sa kompetisyon—kondili aron mapalig-on ang lokal nga kultura, mapadasig ang panaghiusa, ug masiguro nga mapreserbar ang mga pista nga maoy garbo sa matag komunidad sa Bohol. (RTB)
