DAKONG garbo alang sa lungsod sa Valencia pinaagi sa Municipal Agricultures Office human kini makadaog sa 1st Place sa Best Booth and Product Display Contest atol sa Sandugo Agri Fair 2026 Celebration nga gihimo sa Plaza Rizal, Tagbilaran City gikan Hulyo 13 hangtod 17, 2026.
Ang maong Certificate of Award gihatag sa Municipality of Valencia isip pag-ila sa labing maayong booth ug product display nga nagtampok sa tema nga “Panguma ug Pangisda Magpadayon, Bisan pa sa Hagit sa Krisis ug Panahon.”
Ang pasidungog opisyal nga gihatag niadtong Hulyo 17, 2026 sa Plaza Rizal, Tagbilaran City, ug gipirmahan ni Provincial Agriculturist Liza M. Quirog, MNSA ug Bohol Governor Erico Aristotle C. Aumentado.
Matud pa ni Mayor Dionisio Neil A. Balite, J.D., Ph.D., ang maong kadaugan nagpakita sa kakugi, panaghiusa, ug dedikasyon sa mga mag-uuma, mga exhibitor, ug sa tanang mipasiugda sa mga lokal nga produkto sa Valencia.
“Ang maong kadaugan dili lamang pasidungog sa atong LGU kondili sa tanang Valensyanon nga nagpakabana ug nagpalambo sa atong sektor sa agrikultura. Padayon natong suportahan ang atong mga mag-uuma ug ipasigarbo ang kalidad sa mga produkto sa Valencia,” matud ni Mayor Balite.
Gipahalipay usab sa administrasyon ni Mayor Balite ang tanang nahimong kabahin sa maong kalampusan nga nagpasidungog sa lungsod sa Valencia.
