GIDAYEG sa Kagamhanang Probinsiyal sa Bohol (PGBh) ubos sa pamunoan ni Gov. Aris Aumentado ang paspas ug hiniusang aksiyon sa mga awtoridad human masikop ang 35 ka buhing linitsonan nga ilegal nga gipangbiyahe ngadto sa probinsya didto sa lungsod sa Getafe niadtong Hulyo 15.
Ang unang pagsikop gihimo sa mga sakop sa Philippine National Police (PNP)-Getafe ug Philippine Coast Guard (PCG) Substation Getafe, diin nakit-an ang 26 ka baktin sulod sa sakayan nga FBCA Koy and Tin Express nga walay gipakita nga balido nga legal nga mga dokumento.
Gisundan kini sa dinaliang follow-up operation sa Barangay Salog diin narekober ang siyam pa ka baktin, nga nagdala sa kinatibuk-ang ihap sa nasakmit ngadto sa 35.
Nasayran nga ang mga mananap gikan sa Barangay Sonog, lungsod sa San Francisco, Sugbo, ug gituyo unta nga ihatod dinhi sa Bohol. Kini usa ka dayag nga paglapas sa Executive Order No. 28 nga gipirmahan ni Gov. Aumentado, nga nagpatuman og 60 ka adlaw nga temporaryong pagdili sa pagsulod sa mga buhing baboy ug mga produkto gikan sa baboy aron mapanalipdan ang probinsya batok sa African Swine Fever (ASF).
Ang mga nasakmit nga baktin gitugyan na ngadto sa Getafe Municipal ASF Inter-Agency Task Force pinaagi sa Municipal Agriculture Office, sa pakigtambayayong sa Office of the Provincial Veterinarian (OPV) alang sa saktong pagdumala sumala sa mga sumbanan sa biosecurity. Ang sakayan nagpabilin sa kustodiya sa PCG alang sa dugang nga imbestigasyon.
Matod sa PGBh, ang malampusong operasyon nagpakita sa hugot nga baruganan sa pagpanalipod sa agrikultura, seguridad sa pagkaon, ug panginabuhian sa mga Bol-anon isip kabahin sa Strategic Governance Roadmap — ilabi na nga ang Bohol mao ang una ug bugtong UNESCO Global Geopark sa Pilipinas. (RTB)
