OPISYAL nang gipirmahan ni Mayor Jane Yap karong Biyernes, Hulyo 17, ang ordinansa nga nagpaubos sa minimum nga plete sa tricycle gikan sa ₱20 ngadto sa ₱15, apan malangan ang pagpatuman niini ug gilaoman na karong Hulyo 27 tungod sa paglangan sa gikinahanglang publikasyon.
Gikompirma kini ni City Councilor Leonides “Edi” Borja, chairman sa Sangguniang Panlungsod Committee on Public Utilities ug awtor sa maong ordinansa.
Matod ni Borja, dili na maapil sa isyu sa mantalaan karong Domingo ang dokumento tungod kay naabtan na kini sa printing cut-off sa dihang giduso sa opisina sa kalihim sa Sangguniang Panlungsod ang maong ordinansa. Tungod niini, dili na madayon ang orihinal nga target nga pagsugod sa pagpatuman sa Hulyo 20.
Ang ordinansa — Proposed Ordinance No. 30-26, Series of 2026 — giaprobahan sa Sangguniang Panlungsod atol sa regular nga sesyon niadtong Hulyo 14 ubos sa pagpangulo ni Vice Mayor Adam Relson Jala. Nag-amendar kini sa Traffic and Transportation Code sa Tagbilaran City.
Ubos sa bag-ong sukaranan, ang minimum nga plete sa regular nga pasahero mahimong ₱15, uban ang dugang ₱3 matag mosunod nga kilometro. Alang sa mga senior citizen, estudyante, ug persons with disabilities (PWDs), ang minimum nga plete mahimong ₱12 ug ₱2.40 matag dugang kilometro.
Gitugotan usab sa ordinansa nga usbon ang dugang bayad matag kilometro pinaagi lang sa resolusyon kon mosaka o moubos ang presyo sa petrolyo, apan ang minimum nga base fare nga ₱15 mahimo lamang usbon pinaagi sa laing ordinansa.
Hangtod dili pa makompleto ang publikasyon ug uban pang legal nga rekisitos, magpadayon gihapon ang kasamtangang minimum nga plete nga ₱20 sa tibuok lungsod. (RTB)
