TAGBILARAN CITY Bohol (PIA)— Nunot sa rekomendasyon sa Office of the Provincial Agriculturist (OPA), nagkahiusa ang mga sakop sa Provincial Disaster and Risk Reduction Management Council nga iduso pa gihapon ang cloud seeding operations isip mahinungdanon nga lakang pagpakunhod sa epekto sa El Nino.
Didto sa unang kwarter nga tigum sa PDRRMC sa Ceremonial Hall sa Kapitolyo sa miaging Martes, Hunyo 16, 2026, giduso ang mosyon sa Konseho nga sagopon ang baruganan sa OPA, sa Bureau of Soils and Water Management (BSWM) sa Department of Agriculture (DA) nga iapil ang cloud seeding operations sa mga lakang pagpakunhod sa kadaut nga dala sa gitagna nga taas nga lanat sa ting-init.
Ang cloud seeding operations mao ang paggamit sa artipisyal nga pagsabod sa asin sa naporma nga panganod nga maoy mopa-ulan, aron kini matagak ngadto sa mga basakan ug tinubdan sa katubigon nga magamit sa mga basak.
Ang baruganan usab sa PDRRMC sa Bohol gipadayag bisan pa nga may una nga gipagawas ang Malakanyang kabahin sa pagpangandam sa El Nino.
Niadtong 2023 kanus-a nasinati usab ang taas nga lanat sa ting-init, gimandu ni Presidente Ferdinand Marcos Jr., ngadto sa mga ahensya sa goberno sa pagpalig-on sa pagpangandam batok sa huwaw ug sagopon ang mga lakang nga nahasubay sa siyensya.
Gipasabut sa kagamhanan nga samtang ang cloud seeding usa lamang sa daghang mga lakang nga gitimbangtimbang nga gamiton, kinahanglan, matud pa sa Malakanyang ang protocol-based ug scientific nga mga pmaagi sa pagpakunhod sa epekto sa El Niño.
Tungod niini, nagtuo ang mga sakop sa konseho nga ang baruganan sa Malakanyang kabahin sa cloud seeding anaa gihapon basta kay kini makatabang sa mga mag-uuma nga mapun-an ang mga nanga-uga na nga mga tinubdan sa tubig.
Kini usab ang baruganan nga gisubay sa DA BSWM.
Ang paggamit sa siyentipiko nga pagtimbangtimbang sa PAG-ASA aron ilhon kon anaa na ba ang tumpak nga mga kondisyones aron makahimo na sa cloud seeding importante sa hukom, dayag sa palasyo.
Kinahanglan usab nga dili lamang ang cloud seeding ang saligan, kon dili ang uban pang mga mas lapad nga polisiya sa pagpatubig sa mga umahan.
Dili ma kini igo alang sa kinatibuk-ang lanat sa tag-init, ang PDRRMC sa Bohol aduna na usab pahat nga giandam alang sa cloud seeding.
Kini gilauman usab nga abagan sa kagamhanan pinaagi sa DA BSWM. (Rey Anthony Chiu/ PIAbohol)
