VALENCIA, Bohol — Malampuson ug makahuluganon ang pagsaulog sa ika-128 nga Anibersaryo sa Philippine Independence Day sa lungsod sa Valencia niadtong Hunyo 12, 2026, diin nagkahiusa ang lokal nga panggamhanan, mga magtutudlo, estudyante, ug nagkalain-laing sektor sa komunidad sa pagpasidungog sa kagawasan sa nasod ug sa mga kalampusan sa mga Valencianhon.
Gipangunahan ni Valencia Mayor Engr. Dionisio Neil A. Balite, J.D., Ph.D. ug sa Sangguniang Bayan sa Valencia ubos sa liderato ni Vice Mayor Aristotle C. Cometa ang maong selebrasyon nga gipahigayon sa Municipal Grounds.
Usa sa mga highlight sa programa mao ang pagpasidungog sa mga Valencianhon nga nakahatag og dungog sa lungsod ug sa nasod. Lakip niini sila KC Mae Gamayon ug Zander Galiposo, nga nakadaog og mga medalya sa 2026 Palarong Pambansa ug nakapakita sa talento, disiplina ug determinasyon sa kabatan-onan sa Valencia.
Gihatagan usab og espesyal nga pag-ila sila CDT 1CL Rolenx Feil M. Villoceno, nga bag-ong migradwar sa Philippine Military Academy (PMA) “Talang Dangal” Class of 2026, ug PLt Jemuel B. Ampit, nga migradwar sa Philippine National Police Academy (PNPA) “Silang Paglaom” Class of 2026. Sumala sa lokal nga panggamhanan, ang ilang kalampusan usa ka inspirasyon sa kabatan-onan ug pagpamatuod nga ang mga Valencianhon makahimo sa paglambo sa nasodnong entablado pinaagi sa integridad, serbisyo ug pagpaningkamot.
Sa iyang mensahe, gipasiugda ni Mayor Balite nga ang tema karong tuiga nga “Kalayaan. Kinabukasan. Kasaysayan.” dili lamang paghinumdom sa kagawasan nga naangkon sa mga bayani, kondili usa usab ka hagit sa matag Pilipino sa pagtukod og mas maayong kaugmaon.
Gipaambit usab sa alkalde ang mga leksyon nga iyang natun-an pinaagi sa Duaw-Pamahaw, usa ka personal nga outreach initiative nga iyang gisugdan niadtong Agosto 1, 2024. Matud niya, kapin na sa 600 ka vulnerable households gikan sa tanang 35 ka barangay sa Valencia ang iyang personal nga nabisitahan, lakip ang mga senior citizens nga nag-inusara, persons with disabilities, solo parents, indigent families ug mga pasyenteng nag-atubang og grabeng sakit.
“Ang maayong pang-gobyerno magsugod sa pagpaminaw,” matud ni Mayor Balite.
Sumala kaniya, ang mga estorya ug kasinatian nga iyang nadunggan gikan sa mga panimalay maoy nahimong inspirasyon sa mga bag-ong innovation proposals nga iyang gipresentar sa Local Governance Executive and Management Course sa Development Academy of the Philippines.
Lakip niini ang BARUG Valencia ALARMA (BAVALA) System, usa ka Poverty Early Warning System nga nagtumong sa pag-ila sa mga pamilya nga nanginahanglan og tabang sa dili pa mograbe ang ilang kahimtang; ang Duaw-Pamahaw Support Team (DUPAST) nga maghatag og mas organisado ug dugayng suporta sa health, education, livelihood ug social welfare; ug ang BARUG CARENAV Ecosystem, usa ka integrated platform nga magduol sa serbisyo sa gobyerno ngadto sa mga kabalayan pinaagi sa teknolohiya ug community outreach.
Matud ni Mayor Balite, ang maong mga inobasyon positibong gidawat ug aprobahan alang sa dugang nga pagpalambo, ug nagpakita sa tumong sa lokal nga panggamhanan nga himuong mas proaktibo, mas responsive ug mas malasakiton ang pagserbisyo sa katawhan.
“Ang kagawasan mahimong tinuod nga makahuluganon kung matag Valencianhon adunay oportunidad, dignidad ug paglaum. Atong ipadayon ang pagtinabangay aron makatukod og mas lig-on, mas progresibo ug mas malungtarong Valencia alang sa umaabot nga mga henerasyon,” dugang pa sa alkalde.
Ang maong selebrasyon nahimong usa ka pahinumdom nga ang kagawasan dili lamang bahin sa kasaysayan, kondili usa usab ka responsibilidad sa matag Pilipino sa pag-amot alang sa kalinaw, kauswagan ug mas maayong kaugmaon sa komunidad. (Adrian Tagupa)
