NIPAHIMANGNO ang health ug weather officials sa publiko nga mangandam sa dakung risgo sa panglawas gumikan sa grabeng kainit sa panahon sa higayon nga magsugod na ang El Niño.
Gipahibawo ni Dr. Shelbay G. Blanco, pangu sa Regional Health Emergency Management Services sa Department of Health Central Visayas Center for Health Development, nga gipaubos na sa DOH sa Code White ang mga health facilities aron pagpangandam sa posible nga mga heat-related emergencies.
“We are also issuing a Code White for init sa tag-init. It’s more of Oplan El Niño phenomenon,” suma pa ni Blanco.
Nagkanayon si Blanco nga sagad sa dali nga maapektuhan sa heat exhaustion ug heat strioke mao ang mga edaran, mga bata ilabi na ang mga bag-ong natawo ug mga infants ug dili angayan nga magbuwad og dugay sa init.
“Magkasaka atoa edad especially 65 years old and above, ang atoa sang fluid level sa atoang lawas nagkaminus. If nagka minus ang fluid level sa atoang lawas, we are also at higher risk of dehydration,” dugang pa niya.
Iyang giawhag ang publiko nga kanunay nga moinom og tubig, magsul ob og light-colored clothing, mogamit og payong ug kalo ug likayan nga magbuwad sa init gikan sa alas 9 sa buntag hangtud sa alas 4 sa hapon.
Samtang si Engr. Jhomer Eclarino, ang chief sa Forecasting Section sa PAGASA Visayas, miingon nga giisa na sa state weather bureau ang El Niño alert niadtong Abril 22.
“It means nagka saka na or high probability na ma develop ang El Niño in the next coming two to three months,” suma ni Eclarino. (RTB)
