USA ka reklamo ang gipaabot sa usa ka pasahero batok sa ticketing office sa OceanJet sa Pier 1 sa dakbayan sa Sugbo human niya masinati ang giingong sistema sa pagpamaligya og ticket nga nagtanyag og mas doble nga presyo.
Sumala sa Facebook post sa pasahero nga si Michelle Cecillio, gisultihan siya sa ticketing office nga wala na’y biyahe alang sa alas-10 sa buntag ug ang sunod nga bakante nga oras anaa pa sa ala-1 sa hapon.
Apan samtang anaa sa maong sitwasyon, kalit lang matud pa siya nga giduol sa usa ka wala mailhing indibidwal ug gitanyagan og ticket alang sa alas-10 sa buntag apan sa mas doble nga kantidad.
“Sa management sa OceanJet palihog ko aning Cebu Pier 1 ninyo nga ticketing office. Moingon nga wala nay 10am, 1pm na sunod, unya naay mo kuhit naku dayon ingon, “maam naa pay 10am double lang bayad” sa kalisod sa panahon ga-palabi sab mo oi. Sa Bohol wala man ani nga system.” suma pa ni Cecillio
Gipahayag ni Cecillio ang iyang kasagmuyo sa maong hitabo ilabi na nga dako ang panginahanglan sa mga pasahero nga makaabot dayon sa ilang destinasyon apan mapugos na hinuon sa pagbayad og mas mahal tungod sa giingong binuhatan.
Gikumpara usab niya kini sa iyang kasinatian sa Bohol diin matud pa niya wala’y ingon niini nga matang sa sistema sa pagpaniket. Nanawagan siya sa kadumalahan sa OceanJet nga tagaan og pagtagad ang maong insidente dungan sa pagpangutana sa konsiderasyon sa kompanya ngadto sa mga ordinaryong sumasakay taliwala sa kalisod sa panahon karon.
“Ga dali ta, pero closed na, unya naa diay available pa pero bayad kag mahal. Asa naman inyong konsiderasyon oi nga lisod kaayo ang panhaon karon.” katapusang pamahayag niya.
Sa pagkakaron, wala pa’y opisyal nga pamahayag o pagpatin-aw ang kadumalahan sa OceanJet kalabot sa maong reklamo nga padayon karong gihisgutan sa social media. (RTB)
