GI-AWHAG ni 2nd District Board Member Jiselle Rae Aumentado-Villamor ang Provincial Tourism Development Council (PTDC) nga magpagawas og klaro ug opisyal nga price guide aron masulbad ang kalibog sa mga presyo sulod sa lokal nga industriya sa turismo.
Una nang gipahibaw sa Bohol Confederation of Tourist Transport Providers (BCTTP) nga mopasaka ang ilang grupo og 40% nga rate sa ilang serbisyo tungod sa nasinati nga Krisis sa lana. Ang maong plano gisupak sa Bohol Association of Travel and Tours Operators (BATTO) nga mihulagway nga taas ra kaayo ang 40%.
Sumala ni Aumentado-Villamor, masabtan ang pagsaka sa mga bayranan tungod sa kasamtangang krisis nga nakaapekto sa presyo sa mga palaliton, lakip na ang gasto sa transportasyon. Ilabi na, giila niya nga adunay basehan ang hangyo sa tourist transport groups alang sa rate adjustments.
Bisan pa niini, gipunting sa opisyal nga aduna gihapoy kalibog ug kakulang sa panagkasinabot tali sa nagkalain-laing stakeholders sa sektor sa turismo. Dili lamang ang transport sector ang apektado, kundili usab ang ubang mga kabahin sa industriya nga adunay nagkalain-laing opinyon kabahin sa gisugyot nga pagtaas sa presyo.
Matud pa niya, adunay mga inisyal nga kasabutan nga nahimo na sa pipila ka stakeholders, apan wala pa kini hingpit nga na-implementar. Lakip sa mga isyu nga gitan-aw mao ang gisugyot nga 40 porsyento nga pagtaas sa rates, nga hangtod karon wala pa maipatuman ug nakadawat usab og lain-laing reaksyon gikan sa ubang sektor. Aduna sab mga suhestiyon nga ipatuman na lamang ang fuel surcharge imbes nga dako nga porsyento nga pagtaas.
Tungod niini, nanawagan si Aumentado-Villamor sa PTDC nga ipatuman ang mandato sa provincial tourism code. Sumala sa maong balaod, ang konseho maoy responsable sa pagtigom sa tanang stakeholders, pagpahigayon og konsultasyon, ug pag-facilitate sa mga kasabutan bahin sa price adjustments, labi na sa mga deregulated nga sektor—kanang walay national agency nga nagtakda sa presyo.
Gipasabot sa board member nga pinaagi sa pagpagawas og price guide, mahimong masiguro ang usa ka organisado, patas, ug transparent nga sistema sa pagtakda sa presyo, nga makabenepisyo sa tanang kabahin sa industriya ug sa mga turista. (RTB)
