NALUTSAN og warrant of arrest ang kanhi mayor sa Tagbilaran City nga si Dan Lim ug ang iyang aide nga si Arlene Karaan tungod sa kasong cyberlibel, human maapil sa ilang mga pahayag ang usa ka inosenteng bata sa isyu sa politika.
Ang warrant giisyu sa Quezon City Regional Trial Court base sa resolusyon sa Quezon City Prosecutor’s Office nga nakakita og prima facie nga ebidensya batok sa duha.
Sumala sa imbestigasyon, ang kontrobersiya naggikan sa mga pamahayag ni Lim ug Karaan sa ilang radio program nga Barog Bohol, diin ilang gihisgutan ang “paternity” sa anak sa magtiayon nga sila Gov. Erico Aristotle Aumentado ug Rep. Maria Vanessa Aumentado.
Giingon sa kampo ni Maria Vanessa Aumentado nga ang maong mga pahayag dili lamang personal nga pag-atake, kondili direktang nakaapekto sa dignidad sa ilang anak, nga walay labot sa politika.
Sa reklamo, gipasiugda sa kongresista nga ang mga giingon sa broadcast nagpasabot og infidelity ug nagpasangil kaniya og krimen nga adultery—mga alegasyon nga makadaot sa iyang reputasyon isip publiko nga opisyal ug isip inahan.
Nasayran nga boluntaryong mitahan sila Dan Lim ug Arlene Karaan sa mga otoridad sa Quezon City ug nakapiyansa og ₱48,000 matag usa.
Sa 18-panid nga resolusyon nga gipetsahan Pebrero 19, 2026, giingon sa piskalya nga ang mga pahayag sa duha klarong naghisgot sa pagkaamahan sa bata ug nagdala og implikasyon nga adunay pagluib, nga maoy basehan sa kasong cyberlibel ubos sa Revised Penal Code of the Philippines ug Cybercrime Prevention Act of 2012.
Matod pa kang Atty. Lord Marapao IV, magpadayon na ang proseso sa korte samtang nag-atubang ang mga akusado sa kaso.
Ang maong insidente nagpasabot sa peligro sa pag-apil sa pribadong kinabuhi—ilabi na sa mga bata—sa bangga sa politika, nga mahimong moresulta sa seryosong legal nga sangputanan.
