DAKONG garbo ug kalipay ang gibati sa Probinsyal nga Gobyerno sa Bohol human makab-ot sa T-MATES ang kampeonato sa World of Dance Philippines 2026.
Gipakita sa T-MATES ang talagsaong kahanas sa pagsayaw, diin ilang gipilde ang 48 ka nagkadaiyang dance crews aron masungkit ang titulo ug ang ₱100,000 nga premyo.
Tungod sa ilang kadaugan, sila usab ang napiling morepresentar sa Pilipinas sa World of Dance Summit Championship nga pagahimoon karong Hulyo sa Los Angeles.
Matud ni Gov. Aris Aumentado, ang kalampusan sa grupo dili lamang bunga sa ilang talento kondili resulta usab sa ilang walay hunong nga dedikasyon, panaghiusa, ug paningkamot isip usa ka team.
“Ang inyong kadaugan nagpamatuod nga pinaagi sa disiplina ug gugma sa gibuhat, makab-ot gayud ang mga damgo sa hustong panahon,” matud sa gobernador.
Nagpasalamat usab siya sa T-MATES tungod sa pagpasigarbo sa Bohol ug sa talento sa mga Bol-anon, ug misaad nga magpadayon ang suporta sa probinsya ilabi na sa ilang umaabot nga pag-apil sa internasyonal nga kompetisyon.
Gihatagan usab og pag-ila ang Center for Culture and Arts Development alang sa ilang dakong papel sa pagtabang pinansyal sa team, lakip na ang pagpasayon sa ilang partisipasyon ug paglihok sa cash incentive alang sa grupo. (RTB)
