GIBUTYAG ni Alona Gamana, asawa ni Allan Gamana, biktima sa gi-ingong kidnapping incident sa Integrated Bus Terminal sa Tagbilaran City niadtong Marso 11 nga ikaduha nang higayon nga gisignit ang iyang bana sa wala mailhing lalaki.
Matud ni Alona nga ang unang insidente niadtong December 2025 kung asa gisulod ang ilang panimalay sa Barangay Guinsularan, Duero og di mominus 15 ka mga tawo nga pulos nagtaptap sa nawong.
Bag-o gisignit si Allan Gamana, matud ni Alona nga gipanguha usab sa mga lalaki ang ubang gamit sa ilang balay sama sa alahas, sapatos ug uban pa.
Apan bisan sa hitabo wala magpa blotter sa buhatan sa kapolisan si Alona tungod kay matud pa gihulga sila sa mga lalaki.
Ang ikaduhang insidente mao ang hitabo sa Tagbilaran City. Wala usab nagpa blotter si Alona sanglit alang kaniya dili na kini gusto og kasamok og ang importante nga naka-uli ang iyang bana nga luwas.
Sa pagkakaron wala na igkita si Allan sa ilang pinuy-anan kay matud ni Alona nga milakaw kini aron mangita og trabaho. (RTB)
