HUMAN sa hingpit nga deliberasyon ug konsultasyon sulod sa tulo ka oras nga emergency meeting uban sa mga sakop sa Sangguniang Panlungsod, Barangay Kapitanes ug mga city hall department heads niadtong Martes sa gabii, nahukman sa kagamhanan sa siyudad sa Tagbilaran nga i-postpone ang pipila ka mga dagkong kalihukan sa Saulog hangtod nga molig-on ang sitwasyon.
Gipahibalo ni Mayor Jane Yap nga dili madayon sa Abril 19 ang “Mutya sa Tagbilaran” ug ang “Maoy sa Mayo” sa Mayo 3.
Bisan og lisod apan gikinahanglan nga desisyon, ang mayor miingon nga ang kompletong lista sa mga apektadong kalihukan ang ipagawas sa dili madugay.
Sa samang higayon, ang tanang kalihokan sa pista nga gipasiugdahan sa pribadong sektor, magpadayon.
Apan, magpadayon ang Street Dancing Competition and Ritual Showdown sa Abril 26.
Sa dili pa ang street dancing, ipahigayon ang foot procession nga salmotan sa tanang barangay ug sundan sa usa ka Santos nga Misa.
Pasigaon ang mga kadalanan og mga kandila, simbolo sa paglaum taliwala sa kangitngit, sa panaghiusa taliwala sa kawalay kasiguroan, ug ang dili matarug nga pagtuo ngadto kang Señor San Jose nga maoy mogiya ug manalipod sa Tagbilaran niining panahon sa krisis.
Magpadayon usab ang Saulog Bazaar ug ang mga kalihokan matag gabii sa City Hall aron suportahan ang Small and Medium Enterprises (SMEs).
Gipasabot sa mayor nga kinahanglang ipadayon ang ekonomiya sa siyudad aron ang mga sa mga pampublikong panakayan sama sama sa traysikol ug multicab ug ang mga tag-iya sa gagmay nga negosyo makapadayon sa pagpangita og kwarta ug pag-atiman sa ilang mga pamilya.
Dugang pa ni Mayor Jane Yap, nga wala unay tugotan nga makagamit sa mga city bus alang sa ubang mga katuyoan.
Ang tanang city buses gamiton alang sa Libre Sakay sa pinili nga mga rota.
Gihangyo usab sa mayor ang Sangguniang Panlungsod nga hatagan siya og awtoridad sa pagkansela sa mga prangkisa ug business permit sa mga traysikol ug mga establisemento nga nagpahimulos niining krisis.
Gipaandam usab sa mayor ang paghatag og fuel subsidy ug rice assistance para sa labing huyang nga mga sektor. (RTB)
