GIPAKLARO sa shipping company nga OceanJet nga sa pagkakaron walay ipatuman nga pagsaka sa plitehan bisan pa sa nagpadayon nga krisis sa suplay sa lana nga nakaapekto sa daghang transport services.
Sa advisory nga gipagawas sa kompanya, giingon nga ang ilang contingency plan may kalabotan lamang sa temporaryong pag-adjust o pagkansela sa pipila ka biyahe sa ilang mga iskedyul.
Kini gihimo isip pagsunod sa Maritime Industry Authority (MARINA) Advisory No. 26-10, Series of 2026, nga nagtugot sa mga shipping company nga maghimo og operational adjustments tungod sa krisis sa lana nga nakaapekto sa kalibutan.
Matud pa sa OceanJet, ang mga pasaherong maapektuhan sa kanseladong biyahe i-accommodate sa alternatibong trips sa kompanya kon mahimo aron malikayan ang dakong abala sa mga biyahero.
Bisan pa niini, gipatin-aw sa kompanya nga wala pay fare increase nga ipatuman sa karon, apan posible kining mausab depende sa kahimtang sa presyo sa lana sa umaabot.
Gipahimangnoan usab sa OceanJet ang publiko nga magbantay sa mga fixer o scammer nga nagpakalat og sayop nga impormasyon o nag-offer og dili awtorisadong ticketing ug rebooking services.
Gitambagan ang mga pasahero nga mopalit lamang og tiket pinaagi sa opisyal nga ticketing offices, authorized agents, ug online platforms sa OceanJet.
Padayon usab ang panawagan sa kompanya nga mosalig lamang sa mga opisyal nga pahibalo nga ipagawas sa ilang opisyal nga social media ug customer service channels aron malikayan ang kalibog ug sayop nga balita. (RTB)
