IPATAWAG sa Sangguniang Panlungsod sa dakbayan sa Tagbilaran ang OceanJet aron maklaro ang palisiya niini bahin sa pag-check-in sa pasahero sa dili pa molarga ang barko.
Ang reklamo gikan sa usa ka pasahero mahitungod sa palisiya giisa ni Konsehal Leonides “Edi” Borja, chairman sa Committee on Public Utilities and Franchises, atol sa regular session sa konseho nga gipangulohan ni Bise Mayor Adam Relson Jala niadtong Martes, Pebrero 24, 2026.
Nasagmuyo si Borja sa bag-ong palisiya sa OceanJet nga kinahanglan makacheck-in na ang pasahero 30 minutos sa dili pa molarga ang OceanJet.
Gihulagway sa magbabalaod nga dili makatarunganon ang maong palisiya bisan pa og nakabutang kini sa ticket.
Gawas pa niini, dapat usab magbutang og personahe ang Oceanjet sa check-in area panahon nga magpa-rebook aron dili mahasol ang pasahero sa pag-adto sa ticketing outlet sa gawas sa pantalan.
Buot masayran usab niya kung unsa man puy tulubagon sa Oceanjet kung ang barko mao ang malangan, hinungdan nga ipatawag ang Oceanjet ingon man ang Coast guard ug PPA sa sunod sesyon. (RTB)
