OPISYAL nga gilusad ni Department of Health (DOH) Secretary Dr. Teodoro Herbosa ang PhilHealth GAMOT program sa Central Visayas, nga naghatag og libreng essential nga tambal alang sa kasagarang mga sakit isip kabahin sa padayon nga pagpatuman sa Universal Health Care (UHC).
Ang PhilHealth GAMOT o Guaranteed Access to Medicines for Outpatient Treatment naglangkob sa 74 ka essential nga tambal alang sa mga sakit sama sa infectious diseases, hypertension ug mga sakit sa kasingkasing, nervous system disorders, thrombotic conditions, asthma ug chronic obstructive pulmonary disease (COPD), diabetes, dyslipidemia, ug uban pang supportive therapies.
Matod ni Herbosa, ang benepisyo maoy konkretong pagpatuman sa primary care benefits nga gilatid sa UHC Act nga gipasa niadtong 2019.
Ang GAMOT ubos kini sa Yaman ng Kalusugan Program (YAKAP).
Ang YAKAP mao ang gipalapad nga primary care benefit package sa PhilHealth nga nagtutok sa preventive ug promotive health services, imbes nga puro na lamang pagtambal kung grabe na ang sakit. Tumong niini nga masiguro nga ang matag Pilipino adunay access sa komprehensibo, dekalidad, ug abot-kayang outpatient care.
Pinaagi sa YAKAP, ang mga miyembro sa PhilHealth ug ilang mga dependents mahimong makadawat og medical consultation ug health risk assessment; Piniling laboratoryo ug diagnostic tests; Preventive ug cancer screening services; Health education ug counseling; ug gireseta nga essential outpatient medicines pinaagi sa GAMOT.
Apil usab sa programa ang pagpalapad sa preventive services, lakip ang screening alang sa kasagarang kanser sama sa Lung cancer pinaagi sa low-dose chest CT scan; Breast cancer pinaagi sa mammography ug breast ultrasound; Liver cancer pinaagi sa alpha-fetoprotein test ug liver ultrasound; ug Colon cancer pinaagi sa colonoscopy human sa positibong FIT o FOBT result.
Samtang, ang GAMOT benefit naghatag og mas dako nga suporta sa tambal alang sa outpatient treatment.
Aron makagamit sa benepisyo, kinahanglan nga mopili ang miyembro og accredited YAKAP clinic, magpa-konsulta sa YAKAP physician, ug ipresentar ang reseta ngadto sa accredited GAMOT provider alang sa dispensing sa tambal.
Gikinahanglan usab ang regular nga follow-up aron masiguro ang padayon nga pagmonitor sa kahimtang sa pasyente. (RTB)
