NANGAYO og pasaylo ang tour guide nga si Loraine Arboleras ngadto sa Philippine Ports Authority (PPA) human nag-viral sa social media ang iyang pakiglalis sa usa ka port police officer didto sa Port of Tagbilaran niining bag-ohay lang.
Pinaagi sa usa ka opisyal nga pamahayag, giangkon ni Arboleras nga nadala siya sa iyang emosyon tungod sa kapungot ug kabalaka sa sitwasyon nga iyang giatubang niadtong higayona.
Sumala ni Arboleras, wala siyay intensyon nga pakaulawan o pakamenoson ang awtoridad, ang mga opisyales, ug ang mga lagda nga gipatuman sa pantalan.
Isip usa ka propesyonal nga tour guide, iyang gihatagan og bili ang kooperasyon ug respeto sa mga ahensya sa gobyerno nga nagmintinar sa seguridad ug kahusay.
Giangkon usab niya nga ang iyang pagpagawas sa iyang mulo sa publiko nga walay saktong katin-awan mahimong nakamugna og dili maayong pagsabut sa katawhan.
Sa pagtapos sa iyang pamahayag, iyang gipaniguro nga iyang dawaton ang bug-os nga responsibilidad sa iyang nabuhat ug napanulti.
Nisaad usab siya nga sa umaabot nga mga adlaw, iyang idangat ang iyang mga mulo pinaagi sa saktong agianan ug matinahuron nga komunikasyon aron malikayan ang susamang kagubot. (RTB)
