USA na usab ka maayong balita para sa katawhang Valencianhon human pormal nga gi-bendisyunan ang pinakabag-ong LED wall sa LGU Valencia nga nahimutang sa Valencia Astrodome.
Gipangunahan ni Fr. Joseph Skelton Jr., uban ni Mayor Neil Balite, kauban ang mga department heads ug empleyado sa munisipyo sa maong kalihukan dili palang dugay.
Ang maong LED wall nga nagkantidad og ₱1.4 milyon gitumong aron mas mapaayo pa ang presentasyon sa mga programa, cultural activities, sports events, ug dagkong kalihokan sa lungsod.
Sumala ni Mayor Balite, dakong tabang ang LED Wall sa pagpasaka sa kalidad sa serbisyo ug paghatag og mas modernong kasinatian sa mga molingkod ug motambong sa nagkalain-laing kalihokan sa sulod sa Valencia Astrodome.
Gipaabot usab sa amahan sa Valencia nga pinaagi sa maong proyekto, mas mapalapdan ang pagpakabana sa katawhan, mas madani ang mga bisita, ug mas mapaligon ang suporta sa lokal nga kultura, talento, ug sports development sa lungsod.
Ang proyekto kabahin sa padayong paningkamot sa LGU Valencia sa paghatag og kompleto, moderno, ug dekalidad nga pasilidad alang sa tanang Valencianhon, subay sa tumong nga Serbisyong Tinud-anay alang sa katawhan. (AT-RTB)
