MAINITONG giabiabi sa Kagamhanang Probinsyal sa Bohol (PGBh), ubos sa liderato ni Gobernador Aris Aumentado, si Office of Civil Defense (OCD) Region 7 Director Joel Mamon sa usa ka courtesy visit bag-ohay lang.
Si Bise Gobernador Nick Besas ang nangulo sa pagdawat sa opisyal diin ilang gihisgutan ang mga oportunidad alang sa mas hugot nga koordinasyon ug kolaborasyon sa mga inisyatiba sa pagpangandam ug pagtubag sa mga katalagman o disaster response sa tibuok probinsya.
Ang maong panagtagbo nakatutok sa pagpalambo sa mga kasamtangang programa ug pagpauyon sa kooperasyon sa matag ahensya aron masiguro ang kaluwasan ug kaandam sa matat komunidad sa Bohol.
Mitambong usab sa maong tigom silang Provincial Disaster Risk Reduction and Management Office (PDRRMO) Head Dr. Anthony Damalerio ug Engr. Vier Niel Balaba.
Gihatagan og gibug-aton sa maong kalihokan ang krusyal nga papel sa nasyonal ug lokal nga ahensya sa gobyerno sa pagduso sa mga lakang nga magpamenos sa risgo sa katalagman. Kini nga lakang nagtumong sa pagpatuman sa mga proactive nga pamaagi aron masiguro ang kaluwasan sa publiko ug ang kalig-on sa katilingban batok sa bisan unsang hulga sa kinaiyahan.
Pinaagi niining makanunayon nga pakig-alayon, nga nahiuyon usab sa Strategic Change Agenda sa Kapitolyo, ang Probinsya sa Bohol padayon nga nagpauswag sa iyang kapasidad sa pagtubag sa mga hagit sa natural nga mga kalamidad. Isip una ug bugtong UNESCO Global Geopark sa nasod, ang Bohol nagpabilin sa iyang pasalig sa paghatag og paspas ug episyente nga serbisyo publiko aron maprotektahan ang kinabuhi ug kabtangan sa mga Bol-anon. (RTB)
