MAGPADAYON ang National Grid Corporation of the Philippines (NGCP) sa pag-energize sa mga major nga transmission projects sa 2026 human sa pagkompleto sa kritikal nga mga bahin sama sa facility upgrades, expansions, ug mga pagpaayo aron masiguro ang kalig-on ug kasaligan sa grid.
Apil sa mga proyekto nga target nga mahuman karong tuiga mao ang Amlan-Dumaguete 138kV transmission line nga adunay ERC-approved cost nga P 1.9 bilyones; Tuguegarao-Lal-lo (Magapit) 230kV transmission line, P2.4 bilyones; Tuy 500/230kV substation stage 1 nga kabahin sa Tuy-Dasmariñas 500kV transmission line component nga adunay P8.1 bilyones nga pundo; Nabas-Caticlan-Boracay 138kV transmission line, P4.2 bilyones, ug ang Tacurong-Kalamansig 69kV transmission line nga adunay P757.98 milyones nga pundo.
Gikataho nga mahuman usab sa NGCP ang stage 2 sa Visayas Substation Reliability project ingon man ang relocation sa steel poles sa Hermosa-Duhat 230kV transmission line sulod sa tuig. Kini nga mga proyekto nagtinguha sa pag-atubang sa mga ekonomikanhong hinungdan sama sa pagtaas sa load, kasaligan ug siguridad sa sestema, kalidad sa kuryente, ug integrasyon sa bag-ong generating plants, renewable o non-renewable. Kini usab ang magkomplemento sa dagkong inisyatibo sama sa power grid backbones ug island interconnections.
Niadtong 2025, nakompleto sa NGCP ang pag-upgrade ug expansion sa 14 ka substations aron mapalambo ang kalig-on sa grid.
Nakip sa mga mahinungdanong upgrades mao ang Castillejos Substation nga karon adunay 1,000MVA transformer, ug ang bag-ong 300MVA transformers nga giinstolar sa Calaca ug Concepcion Substations.
Uban pa’ng substations sama sa Corella, Toril, Pitogo, Maramag, Dingle, Calbayog, ug Paranas nakadawat og 100MVA transformers samtang ang Davao Substation nakadawat og 150MVA transformer ug ang San Jose ug Mabinay substations gi-upgrade sa 50MVA transformers.
Ang 100MVA expansion sa Iloilo substation kabahin sa Panay-Guimaras Interconnection project nahuman niadtong Abril 2025. Gipatuman usab ang mga inisyatibo alang sa voltage improvement sa Tigaon, Malvar, Baybay load-end station, Sta. Barbara, ug Zamboanga substations.
Ang NGCP padayong nag-awhag sa suporta sa Department of Energy, ubang ahensiya sa gobiyerno, ug local government units aron mapadali ang pag-aproba ug pagpagawas sa gikinahanglan nga mga permit alang sa implementasyon sa kritikal nga transmission projects. (RTB)
