MILIHOK na ang Provincial Investigation and Detective Management Branch (PIDMB) sa Bohol Police Provincial Office (BPPO) nga mohimo og imbestigasyon batok sa mga personnel sa Sevilla Municipal Police Station nga giakusahan og pagkulata sa usa ka barangay kagawad.
Ang insidente nga giingong nahitabo niadtong Pebrero 10, 2026, narekord sa CCTV ug mipasikad og dakong kabalaka sa publiko human kini mikaylap.
Sumala ni PMaj. Rey Olar, Public Information Officer sa BPPO, gilusad ang imbestigasyon ubos sa direktiba ni Patricio Degay Jr., Provincial Director sa BPPO, human makaabot sa ilang opisina ang report kabahin sa maong hitabo.
Bisan pa niini, giklaro ni Olar nga hangtod karon wala pa makadawat og pormal nga reklamo gikan sa giingong biktima.
Gipaniguro sa BPPO nga kon mapamatud-an nga mga pulis ang nakita sa video nga nakalapas sa balaod o nakahimo og human rights violations, posible silang atubangon og administratibo ug kriminal nga kaso, lakip na ang posibleng pagkataktak sa serbisyo depende sa kabug-aton sa sala.
Matod ni PMaj. Olar nga nagpasalig ang kapolisan nga patas ug walay pinalabi ang pag-imbestiga sa maong isyu aron masiguro ang accountability ug pagsalig sa publiko.
Uan niini usa ka Brgy. kagawad nga gitabangan og kulata sa 4 ka mga polis sa Sevilla, nahiagom og 12 ka angol sa lawas.
Sumala pa nga desidedo nang mopasaka og kaso ang usa ka barangay kagawad kinsa gikatahong gitabangan og kulata sa upat ka mga polis pinangoluhan sa hepe niini atol sa giingong buy-bust operation didto sa Purok 5, Lower La Suerte, Brgy. Guinob-an, Sevilla, Bohol. niadtong Martes sa gabii, Pebrero 10.
Base sa medical certificate nga gi-release sa Municipal Health Office kun MHO – Sevilla, mokabat ngadto sa 12 ka mga angol lakip na niini ang nabali nga tudlo ug grabeng bun-og sa gusok nga posibleng dunay crack ang bukog niini ang nahiagoman ni Brgy. Kagawad Eric Gumanoy nga taga Brgy. Ewon, Sevilla human kini gitabangan sa pagkulata sa upat ka mga polis pinangoluhan sa hepe atol sa giingong buy – bust operation didto sa La Suerte, Brgy. Guinob-an, Sevilla, Bohol mga alas 11 sa gabii niadtong Martes, Pebrero 10.
Ang mga suspek nga Police Captain ang hepe, duha ka Police Master Sergeant ug usa ka Patrolman positibong gitumbok ni Gumanoy base sa police blotter sa Sevilla Municipal Police Station.
Gawas niini, aduna nay kopya sa CCTV sa lugar nahitaboan. Ang mga ebidensya giandam na sa biktima nga iduso niya sa Provincial Internal Affairs Service kun PIAS sa PNP sa Kampo Dagohoy sa siyudad sa Tagbilaran, iyang pasiunang lakang sa pagpasaka og kaso batok sa maong mga police officers.
Atol sa pagduso sa mga papeles sa PIAS kaniadtong Biyernes, Pebrero 13, 2026, aduna nay abogado si Gumanoy aron motabang kaniya nga ipasaka ang kaso sa PIAS ug sa proper nga korte.
Duha ka mga kaso ang posibleng pagaatubangon sa mga suspetsado, kini mao ang kasong administrative nga iduso sa PIAS ug kasong kriminal gumikan sa pagpanagmal didto sa Provincial Prosecutor’s Office.
Ang maong mga kaso iduso sa sunod semana sa maong barangay opisyal.
Sa laing bahin, naningkamot ning pamantalaan nga makuhaan sa iyang habig ang maong hepe sa Sevilla, apan wa kini motubag sa tawag sa cellphone niadtong Huwebes sa gabii, Pebrero 12 ug wa usab siya sa ilang buhatan sa Pebrero 13, 2026 kay adunay gilakaw (RTB)
