NILUWAT ang grupong Transparency Good Governance and Accountability Advocates og opisyal nga pamahayag niadtong Huwebes, Enero 29, 2026, aron panalipdan ang integridad sa ilang gipanghatag nga pasidungog o ‘awards’ ngadto sa mga opisyal sa Bohol.
Kini human nakuwestiyon sa pipila ka mga lokal nga opisyal ug sektor ang pagkalehitimo sa maong mga awards nga nag-viral sa social media, dungan usab sa pagklaro sa Department of the Interior and Local Government (DILG) nga wala silay kalambigitan sa maong kalihokan.
Sa ilang gipagawas nga opisyal nga pamahayag, gipasabot sa organisasyon nga ang ilang sistema sa pag-grado ug ranking gibase sa usa ka “public approval and satisfaction survey.”
Matud pa nila, ang tingog sa katawhan mao ang labing gamhanan, ug ang ilang pamaagi gidisenyo aron makuha ang tinuod nga pulso sa komunidad.
Gipasiugdahan sa grupo nga ang ilang ebalwasyon gibase sa patas nga sukdanan (objective criteria) ug tinuod nga performance sa mga serbidor sa publiko aron masiguro ang transparency ug integridad sa maong pag-ila.
Gidugang pa sa grupo nga ang ilang misyon mao ang pagdasig sa maayo nga pagdumala ug paghatag og pasidungog niadtong mga opisyal nga nagpakita og talagsaong liderato ug dedikasyon sa ilang mga konstituwente.
Bisan pa man sa mga pagduda, naniguro ang Transparency Good Governance and Accountability Advocates nga magpadayon sila sa paghupot sa taas nga lebel sa propesyonalismo ug etika, ug nga ang ilang mga pasidungog gibase lamang sa merito ug dili sa bisan unsa nga impluwensya. (RTB)
