ADUNA na’y gitan-aw nga “Person of Interest” (POI) ang kapulisan sa lungsod sa Valencia may kalabutan sa mangilngig nga pagpatay sa usa ka 38-anyos nga babaye kinsa nakit-ang wala na’y kinabuhi sa tunga sa kabasakan sa Barangay Omjon.
Gibutyag sa Valencia PNP nga sa wala pa makit-i ang patay’ng lawas niadtong Enero 30, nasayran nga niadtong Enero 29 duna’y mga kauban nga nagtagay ang biktima, apan human niini wala na’y nasayod sa sunod nga mga panghitabo ug wala pa usab mo-barog nga testigo nga direktang nakakita sa krimen.
Ang biktima giila nga si Charity Albotra, alyas “Anot”, kinsa residente ra usab sa maong barangay. Napalgan ang iyang lawas sa mga residente pasado alas 2 sa hapon niadtong Biyernes ug daling gi-report sa buhatan sa kapulisan pagka-alas 3.
Base sa inisyal nga pagsusi, nakit-an ang biktima nga duna’y lawom nga samad sa liog diin gituohang gigulgol ang ubol-ubol niini gamit ang mahait nga hinagiban.
Nagtoo ang mga otoridad nga nahitabo ang krimen sa sayong bahin sa kaadlawon sa wala pa ang pagkadiskubre sa lawas sa biktima. Bisan pa man sa nakuha nga impormasyon bahin sa nakauban sa biktima sa tagay, nagpadayon pa ang lawom nga imbestigasyon sa Valencia PNP aron pagtino sa tinuod nga motibo ug aron pormal nga mapasaka ang tukmang kaso batok sa suspetsado sa maong maduguon nga hitabo. (RTB)
