NADAKPAN sa kapulisan ang upat ka wanted persons sa buwag nga police operations sa Trinidad, Sagbayan, Calape, ug Dauis niadtong Enero 29, 2026, matod sa Bohol Police Provincial Office (BPPO).
Sa Trinidad, gipatuman ang warrant of arrest batok usa ka 48-anyos nga minyo nga lalaki, residente sa Tagum Sur, Trinidad, tungod sa paglapas sa usa ka municipal ordinance. Gitakda ang piyansa sa ₱2,000.
Sa Sagbayan, nadakpan ang usa ka 49-anyos nga minyo nga magtutudlo gikan sa Barangay Calangahan tungod sa tulo ka ihap sa paglapas sa RA 7610 o ang balaod batok sa pag-abuso sa kabataan.
Nadakpan siya sa Barangay Poblacion, Sagbayan, ug gitakda ang kinatibuk-ang piyansa sa ₱360,000.
Sa Calape, nadakpan ang usa ka 67-anyos nga walay trabaho nga residente sa Barangay Abucayan Norte tungod sa paglapas sa RA 9287 (Service of Sentence) human sa pagserbisyo sa warrant sa korte.
Samtang sa Dauis, nadakpan sa pulisya ang Top 3 Most Wanted Person sa rehiyonal nga lebel, usa ka 25-anyos nga ulitawo nga mangingisda gikan sa Barangay Totolan, tungod sa paglapas sa RA 7610, nga may girekomendar nga piyansa nga ₱200,000.
Ang tanang suspek gipahibalo sa ilang konstitusyonal nga katungod ug karon anaa na sa kustodiya sa kapulisan alang sa hustong disposisyon sa korte.
₱1.23M SHABU NASAKMIT
Nasakmit sa kapulisan ang 182.06 gramos nga gituohang shabu nga balor ₱1,238,008.00 sa usa ka anti-illegal drug buy-bust operation sa Purok 5, Barangay Libaong, Panglao, Bohol pasado alas dose sa kaadlawon niadtong Enero 30, 2026.
Gipatuman ang operasyon alas 12:05 a.m. sa mga operatiba sa Panglao Municipal Police Station, gipangulohan ni PMaj. Sherwin S. Destora.
Nadakpan ang usa ka 43-anyos nga lalaki, single, drayber sa J and T, ug lumad sa Barangay Ubujan, Tagbilaran City, Bohol.
Nasakmit ang usa ka sachet sa gituohang shabu nga 5.62 gramos isip subject of sale ug duha ka sachet nga may gibug-aton 176.44 gramos isip possession, kauban ang buy-bust money nga usa ka tinuod nga ₱1,000 bill ug 14 ka peke, usa ka Samsung keypad cellphone, duha ka bubble wrap container, ug usa ka Honda Click 125 nga motorsiklo.
Gibilanggo ang suspect sa Panglao Municipal Police Station samtang ang mga ebidensiya gisumite sa Bohol Provincial Forensic Unit alang sa laboratory examination ug custody.
Pasakaan ang suspek og kaso sa paglapas sa RA 9165 o ang Comprehensive Dangerous Drugs Act of 2002.
WANTED PERSONS
NADAKPAN sa kapulisan ang duha ka wanted persons sa lain-laing operasyon sa Bohol niadtong Enero 28, 2026, tungod sa droga, armas, ug kawat.
Sa Buenavista, gidakop ang akusado nga si alias “Chiboy,” 30 anyos, dunay live-in partner, residente sa Purok 5, Barangay Eastern Cabul-an, Buenavista, sa Barangay Poblacion pinaagi sa warrant of arrest.
Siya nag-atubang saa paglapas sa R.A. 9165 (Comprehensive Dangerous Drugs Act) ug R.A. 10591 (Firearms and Ammunition Law). Walay piyansa alang sa kasong illegal drugs samtang ang kaso sa armas adunay recommended bail nga ₱120,000. Ang suspek kasamtangang gidetain sa Buenavista Custodial Facility.
Sa Jagna, gidakop sa Jagna Municipal Police Station ang usa ka 29 anyos, ulitawo, residente sa Purok 2, Barangay Bunga Mar, Jagna, gi-ila nga Top 3 Most Wanted sa municipal level.
Siya nag-atubang sa upat ka kaso sa Qualified Theft uban ang recommended bail nga ₱160,000 ug kasamtangang naa sa kustodiya sa Jagna MPS samtang nagpaabot sa legal nga proseso sa kaso. (RTB)
